وەزیری بەرگریی عێراق دەست پێکردنی شەڕی رزگارکردنەوەی شارەدێی گەیارەی باشووری رۆژهەڵاتی مووسڵ راگەیاند.



محەمەد عەسکەری، راوێژکاری سەربازیی وەزارەتی بەرگری بە میدیا عێراقییەکانی راگەیاندووە، کە فیرقەی نۆی زرێپۆش و فەوجەکانی رووبەڕووبوونەوەی تیرۆر بە هاوکریی فڕکە جەنگییەکانی هاوپەیمانان و هێزی ئاسمانیی عێراقی، بەشداریی ئۆپەراسیۆنەکە دەکەن.



محەمەد عەسکەری هەروەها رایگەیاند، کە سەرلەبەیانیی رۆژی شەممە 18ـی حوزەیرانی 2016، خالید ئەلعوبەیدی، وەزیری بەرگریی عێراق دەست پێکردنی ئۆپەراسیۆنەکەی راگەیاند و پێشیوایە، کە شاردێی گەیارە گرنگترین بنکەی ئیداری و ئاسمانی و ستراتیژییە، بۆ کۆکردنەوەی هێزەکان و هێرشکردنیان بۆ سەر مووسڵ.



چەکدارانی داعش دوای هەرەسهێنانی سوپای عێراق لە مانگی حوزەیرانی 2014، زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.


باسنيوز