دوای بەغدا، خۆپیشاندان گەیشتە سێ پارێزگای دیكەی عێراق، لە ناسرییەش باڵەخانەی ئەو پارێزگایە كۆنترۆڵكرا، خۆپیشاندەران پشتیوانی خۆپیشاندەرانی بەغدا و لادانی گەندەڵكاران دەكەن.

دوای ئەوەی رۆژی هەینی 20-5-2016 خۆپیشاندان لە شاری بەغدا دەستیپێكرد و گرژی و ئاڵۆزی دروستبوو، بەهۆی ئەوەی جارێكی دیكە هێرشیانكردە سەر ناوچەی سەوز، لە پارێزگاكانی بابلی نێوەڕاستی عێراق و دیوانییە و ناسرییەی باشووری عێراق خۆپیشاندان دەستیپێكرد.

لە بابل خۆپیشاندەران لە سەنتەری پارێزگاكە كۆبوونەتەوە و لەبەردەم تەلاری پارێزگای بابل مانگرتنیان راگەیاندووە.

لە دیوانییە لایەنگرانی سەدر وەك پشتیوانی بۆ خۆپیشاندەرانی بەغدا، خۆپیشاندانێكی فراوانیان دەستپێكردووە و داوای لادانی گەندەڵكاران دەكەن.

لە پارێزگای ناسریەش خۆپیشاندانێكی فراوان دەستیپێكرد، خۆپیشاندەران هێرشیانكردە سەر تەلاری پارێزگاكە و كۆنترۆڵیان كرد.

پاشنیوەڕی رۆژی هەینی 20-5-2016 خۆپیشاندان لە بەغدا دەستیپێكرد، لەکاتی گەیشتنی خۆپیشاندەران بۆ بەردەم ناوچەی سەوز و باڵەخانەی پەرلەمان، هێزە ئەمنییەکان بە دار، گازی فرمێسكڕێژ و دەستڕێژی گوللە هێرشیان کردە سەر خۆپیشاندەران.

بەهۆی ئاڵۆزی و دروستبوونی تووندوتیژی، دوو خۆپیشاندەر و رۆژنامەنووسێك كوژران، نزیكەی 100 كەسی دیكە بریندرابوون و ژمارەیەك لەوان رۆژنامەنووس بوون، پاشان لەژێر فشاری هێزە ئەمنییەكان ناوچەی سەوزیان چۆڵكرد.





روداو