ئەندامێکی ئەنجومەنی نوێنەرانی عێراق ئاماژە بەوە دەکات، کورد پێداگری لەسەر پشکی خۆی دەکات، بەڵام مالیکی دەیەوێت بۆ دەسەڵات بگەڕێتەوە.

ئەمڕۆ چوارشەممە 27\4\2016، ڕێناس جانۆ، ئەندامی ئەنجومەنی نوێنەرانی عێراق، ڕاگەیاند: “کورد پێداگری لەسەر پشکی خۆی دەکات، ئێمە لەو پشکە کەمتر ڕازی نابین و فراکسیۆنە کوردستانییەکان ئەوەندە داکۆکی لە شەراکەت و لە بەشداریی کورد دەکەن، ئەوەندە پێداگری لەسەر پۆستەکانی بەغدا ناکەن".

ڕێناس جانۆ ئەوەشی ئاشکرا کرد کە پارتی دیموکراتیی کوردستان، پۆست و پایەکانی بەغدای بەلاوە گرنگ نییە و شەڕیش بۆ هیچ پۆست و پایەیەک ناکات، بەڵام شەڕ بۆ مانەوە و ئیرادەی کورد لە بەغدا دەکات. گوتیشی: “ئەوانەی ئەو فەوزایەیان لە پەرلەمانی عێراق دروست کرد، دیاربوو دارەدەستی مالیکی بوون و لێی سوودمەند ببوون، بۆیە ئەوان ئەو ڕەوشەی ئێستای عێراقیان پێ خۆش نییە و دەیانەوێت پشێوی دروست بکەن”. جەختیشی لەوە کردەوە کە مالیکی بە هەموو توانایەوە، هەوڵی گەڕانەوە بۆ دەسەڵات دەدات، بەڵام بەهۆی ئەوەی دۆسیەیەکی زۆری گەندەڵی لەسەر هەیە، گەڕانەوەی “کارێکی ئاستەمە”.