هێزه‌كانی عێراق ئه‌مڕۆ كوژرانی ژماره‌یه‌كی زۆر له‌سه‌ركرده‌كانی داعشیان راگه‌یاند. ئه‌ویش به‌هۆی دوو هێرشی ئاسمانییه‌وه‌ كه‌ فڕۆكه‌كان كردیانه‌ سه‌ر بنكه‌و باره‌گاكانی ئه‌و گروپه‌.



له‌بڵاوكراوه‌ی فه‌رمی هێزه‌ هاوبه‌شه‌كانی عێراقدا هاتووه‌: " له‌كاتێكدا سه‌ركه‌وتنه‌كان به‌رده‌وامن به‌سه‌ر داعشدا، تیمی هه‌ڵۆكانی هه‌واڵگری به‌گوێره‌ی زانیاری وردی هه‌واڵگری دوو هێرشیان كرده‌ سه‌ر سه‌ركرده‌كانی داعش".



له‌بڵاوكراوه‌كه‌دا هاتووه‌: " یه‌كه‌م هێرش له‌ شارۆچكه‌ی قائیم له‌وپه‌ڕی ڕۆژئاوای عێراق جێبه‌جێكرا، كۆبوونه‌وه‌یه‌كی سه‌ركرده‌كانی داعش كرایه‌ ئامانج، له‌و كۆبوونه‌وه‌یه‌دا تاوتوێی پاشه‌كشه‌كردنی داعش له‌زۆربه‌ی ناوچه‌كان ده‌كرا، له‌هێرشه‌كه‌دا 16 ئه‌ندامی باڵای ئه‌و گروپه‌ كوژران، له‌وانه‌ 9 ته‌رمیان ڕه‌وانه‌ی سوریا كرانه‌وه‌، ته‌رمه‌كانی تریش بۆ نه‌خۆشخانه‌ی قائیم به‌ڕێكران".



له‌و سه‌ركردانه‌ی كه‌كوژراون، ئه‌م ناوانه‌ بینراون:



-ئه‌بوسلێمانی چیچانی، به‌رپرسی كه‌تیبه‌ی خۆراسان.



-شێخ جه‌مال ته‌ركی عیساوی ناسراو به‌ عه‌بدولعه‌زیز جنوبی، هاوكاری ئه‌بو ئه‌یوبی میسری بووه‌ كه‌له‌دوای زه‌رقاوی بووبه‌ ڕابه‌ری قاعیده‌ له‌عێراق.



-زیاء زه‌بوع حه‌ردانی، والی كاتی ویلایه‌تی فورات.



-ئه‌بوئه‌حمه‌د جنوبی، په‌یامنێری به‌غدادی و عه‌دنانیه‌.



-عه‌بدولباست جومه‌یلی ناسراو به‌ ئه‌بو حوزه‌یفه‌، یه‌كێكه‌ له‌سه‌ركرده‌ سه‌ربازییه‌كانی ئه‌و گروپه‌ له‌فه‌لوجه‌دا.



له‌وانه‌ش كه‌برینداربوون، ئه‌بو ئه‌نه‌سی سامه‌ڕایی، والی پێشوی فورات ده‌بینرێت.



له‌بڵاوكراوه‌ سه‌ربازییه‌كه‌دا هاتووه‌: " هێرشی دووه‌م كراوه‌ته‌ سه‌ر بنكه‌ی سه‌ربازی ئه‌بو ئه‌یوب، له‌شارۆچكه‌ی ڕاوه‌دا. له‌ویشدا 13 سه‌ركرده‌ كوژران و 12ی تریش برینداربوون".







باسنیوز