ئەندامێكی ئەنجوومەنی نوێنەرانی عێراق ئاشكرای كرد نووری مالیكی جێگری لەسەر كار لادراوی سەرۆك كۆماری عێراق؛ دوای ئەوەی لەلایەن هێزەكانی سیاسی و ئیدارەی ئەمەریكا رەت كرایەوە بۆ ویلایەتی سێیەم ببێتەوە سەرۆك وەزیران؛ پیلانگێڕی کردووە بۆ ئەوەی بەهێز ببێتەوە سەرۆكی ئەنجوومەنی وەزیرانی عێراق.


سەرچاوەكە كە لە هاوپەیمانیی نیشتیمانیی شیعەیە بە رۆژنامەی "ئەلشەرقول ئەوسەت"ی راگەیاندووە لەو كاتەوە كە حەیدەر عەبادی بووەتەوە سەرۆك وەزیرانی عێراق؛ مالیكی هەوڵی داوە بەربەست و ئاستەنگ بخاتە بەردەمی بە مەبەستی شكستهێنان بە حكوومەتەکەی و رێگە خۆشكردن بۆ گەڕانەوەی خۆی وەك سەرۆك وەزیران.


سەرچاوەكە جەختی كردووەتەوە كە مالیكی لە چەند هەفتەی رابڕدوودا هەوڵی زۆری داوە كە سەركردەكانی ئیئتیلافی دەوڵەتی یاسا و هاوپەیمانی نیشتیمانی شیعی؛ رازیان بكات كە بگەڕێتەوە پۆستی سەرۆك وەزیرانی عێراق.


ئەندامەكەی هاوپەیمانی نیشتمانی شیعە گوتیشی هادی عامری سەرۆكی رێكخراوی بەدر و میلیشیاكانی حەشدی شەعبی و ئەبو مەهدی موهەندیس سەركردەی پێشووی حەشدی شەعبی و قەیس خەزعەلی سەركردەی میلیشیا شیعەكان پشتگیری لە پلانی گەڕانەوەی مالیكی بۆ پۆستی سەرۆك وەزیران دەكەن؛ ئەویش بەهۆی پشتگوێخستنیان لەلایەن ئیدارەی عەبادی و ئەمەریكاوە.


سەرچاوەكە روونیشی كردووەتەوە كە بۆ ئەم مەبەستە؛ نوری مالیكی چەند جارێك سەردانی ئێرانی كردووە و بۆ سەرگرتنی ئەو پلانەش پشتگیری ئێرانییەكانی بەدەست هێناوە و بەڵێنیشی پێداوە كە ئەگەر گەڕایەوە پۆستی سەرۆك وەزیران هەموو هاوكارییەكی دەكات بۆ سەرخستنی حكوومەتەكەی.








باسنیوز