لیژنه‌ی ده‌ستپاكی له‌ په‌رله‌مانی عێراق رایگه‌یاند، به‌سه‌دان دۆسیه‌ی په‌یوه‌ندار به‌ پرسی گه‌نده‌ڵی گه‌وره‌ ره‌وانه‌ی ده‌سته‌ی ده‌ستپاكی كردووه‌ و ئاماژه‌ به‌وه‌ده‌كات، كه‌ قه‌باره‌ی ئه‌و گه‌نده‌ڵییانه‌ ده‌گاته‌ سه‌دان ملیار دۆلار و ژماره‌ی ئه‌و دۆسیه‌یانه‌ش كه‌ هه‌تا ئێستا بۆ ده‌سته‌ی ده‌ستپاكی ناردووه‌، شازده‌ هه‌زار دۆسیه‌ی گه‌نده‌ڵكارانه‌.

عادل نوری ئه‌ندامی لیژنه‌ی ده‌ستپاكی له‌ په‌رله‌مانی عێراق له‌ لێدوانێكدا بۆ ئاژانسی ئانادۆڵو ئه‌وه‌ی راگه‌یاند، كۆی قه‌باره‌ی ئه‌و پارانه‌ كه‌ به‌ گه‌نده‌ڵی خه‌رجكراون و به‌هه‌ده‌ر دراون گه‌یشتووه‌ته‌ سه‌دان ملیار دۆلار كه‌ ده‌توانرا كورتهێنانی بوودجه‌ی سێ ساڵی داهاتووی پێ چاره‌سه‌ر بكرابایه‌.

هه‌روه‌ها ده‌شڵێت، ئه‌وان له‌گه‌ڵ ده‌سته‌ی ده‌ستپاكی رێككه‌وتوون له‌وه‌ی ده‌ست به‌ كردنه‌وه‌ و لێكۆڵینه‌وه‌ له‌ گه‌نده‌ڵییه‌ گه‌وره‌كان كه‌ ناویان لێنراوه‌ نه‌هه‌نگی گه‌نده‌ڵی بكه‌ن و واز له‌ گه‌نده‌ڵییه‌ بچووكه‌كان بهێنن و به‌دواداچوونیش بۆ پاره‌ براوه‌كان بۆ ده‌ره‌وه‌ی عێراق بكه‌ن.