ئەنجوومەنی پارێزگای نەینەوا کۆنترۆڵکردنەوەی گوندێکی لە باشووری موسڵ لە ئۆپەراسیۆنێکی دابەزینی ئاسمانیدا لەلایەن هێزێکی عێراقییەوە راگەیاند، ئەمەش یەكەم سەركەوتنی سوپای عێراقە لە شارەكەدا دوای كەوتنی لە حوزەیرانی 2014 دا.

محەممەد ئیبراهیم، سەرۆکی لیژنەی ئەمنی لە ئەنجوومەنی پارێزگای نەینەوا، رۆژی یەکشەممە 3-1-2016 رایگەیاند "هێزێکی عێراقی سەر بە فیرقەی ئەرکە تایبەتەکان لە سوپای عێراق، ئۆپەراسیۆنێکی دابەزینی ئاسمانیان بۆسەر گوندی ئەلجدعەی سەر بە شارەدێی گەیارە ئەنجامدا و توانیان گوندەکە بەتەواوی کۆنترۆڵ بکەنەوە".

محەممەد ئیبراهیم ئاماژەی بەوە كردووە "فڕۆکە عێراقییەکان ئۆپەراسیۆنی دابەزینی ئاسمانیان بۆسەر گوندەکە ئەنجامدا و شەڕ و پێکدادان لەنێوان ئەو هێزە عێراقییە و چەکدارانی داعش لە دەوروبەری گوندەکە دروستبوو، هاوکات فڕۆکە جەنگییەکان پێگەکانی داعشیان لە دەوروبەری گوندەکە بۆردوومانکرد".

دوای هەرەسهێنانی سوپای عێراق لە 10-6-2014، رێكخراوی داعش تەواوی شاری موسڵ و ژمارەیەك ناوچەی سەر بە پارێزگاكانی ئەنبار، سەڵاحەدین، دیالەو کەرکووکی كۆنترۆڵكرد، ئێستاش بەشێكی زۆری ئەو ناوچانە بەدەست رێكخراوەكەن و كۆنترۆڵ نەكراونەتەوە، هێزی پێشمەرگە و ئەمریكاش چەند ئۆپەراسیۆنێكی دابەزینیان بۆ نێو خاكی داعش بەتایبەت لە حەویجە ئەنجامداون.














رووداو -