“نوری مالیكی” جێگری پێشووی سه‌رۆككۆماری عێراق، له‌تارانه‌وه‌ هێرشی توند ده‌كاته‌ سه‌ر سعودیه‌ و ده‌ڵێت: ” سعودیه ‌له‌ناوچه‌كه‌ و ئه‌ورووپا وئه‌مریكاشدا بیری تیرۆری چاند”.


له‌كۆبوونه‌وه‌یه‌كدا كه‌بۆ یه‌كێتی ڕادیۆو ته‌له‌فزیۆنه‌ ئیسلامییه‌‌كان سازكرابوو گوتی: ” پێویسته‌ به‌ئاشكرا هێڵی وه‌هابی و فیكری ته‌كفیری بۆ جیهان ئاشكرا بكرێن”.

گوتیشی: ” سعودیه‌ ده‌ستوه‌ردانی كردووه‌ له‌عێراق و به‌حره‌ین و سوریا، ئه‌گه‌ر هاوكاری وڵاتانی دۆستی سوریا نه‌بوایه‌، ئه‌وا دوژمنان ئه‌نجومه‌نی ئاسایشیان بۆخۆیان ژێر بار ده‌خست”.

ئاژانسی هه‌واڵی”ئه‌هلوبه‌یت” ی ئێرانی له‌زاری مالیكییه‌وه‌ گواستیه‌وه‌ كه‌ناوبراو گوتویه‌تی: ” عێراق، له‌دوای ڕووخانی ئه‌و ڕژێمه‌ تایفیه‌ی پێشوو، قه‌ده‌ری وابوو ببێته‌ گوزه‌رگای جیۆستراتیژی بۆ جێبه‌جێ كردنی پرۆژه‌ی له‌ت وپه‌ت كردنی تایفی ناوچه‌كه‌، كه‌ زلهێزه‌كان به‌هۆی هێزه‌ عێراقی و هه‌رێمایه‌تییه‌كانه‌وه‌ جێبه‌جێی ده‌كه‌ن”.

گوتیشی: ” سعودیه و بنه‌ما فیكریه‌كه‌ی، واته‌ وه‌هابیه‌ت، له‌گه‌ڵ ئیسرائیل و بنه‌ما فیكریه‌كه‌ی، واته‌ زایۆنیزم، به‌فه‌رمی سپۆنسه‌ری تیرۆر ده‌كه‌ن”.










باسنیوز