له‌ ئه‌نجامی بۆردومانی فڕۆكه‌كانی هاوپه‌یمانان له‌ پارێزگای ئه‌نبار ده‌ چه‌كداری ڕێكخراوی تیرۆریستی داعش كوژران.به‌ گوێره‌ى زانیاریه‌كانى سه‌رچاوه‌كانی ئه‌منى له‌ ئه‌نجامی بۆردومانی فڕۆكه‌كانی جه‌نگی هاوپه‌یمانان به‌فه‌رمانده‌یی ویلایه‌ته‌ یه‌كگرتووه‌كانى ئه‌مریكا، بۆ سه‌ر باڵاخانه‌ حكومیه‌كان، كه‌ رێكخراوی تیرۆریستی داعش وه‌ك بنكه‌ و باره‌گا بۆ خۆى به‌كاریان ده‌هێنێت، ده‌ چه‌كداری ئه‌و ڕێكخراوه‌ تیرۆریستیه‌ كوژران. هاوكات فه‌رمانده‌ی ئۆپراسیۆنی جه‌زیره‌و بادیه‌ كوژرانی بیست و شه‌ش چه‌كداری تیرۆریستی داعشی له‌ رۆژئاوای پارێزگای ئه‌نبار راگه‌یاند .

له‌ به‌یاننامه‌یه‌كدا هاتووه‌ كه‌ تۆپخانه‌ى سوپای عێراق مۆڵگه‌ی چه‌كدارانی تیرۆریستی داعشی له‌ ناوچه‌ی سه‌گره‌ی رۆژئاوای ئه‌نبار بۆردومانكرد له‌ ئاكامدا بیست و شه‌ش چه‌كداری تیرۆیستی داعش كوژران و دوو ئۆتۆمبێلیش تێكشكێندران . به‌پێی به‌یاننامه‌كه‌ ئه‌م بۆردومانه‌ی تۆپه‌كانی سوپا پشتی به‌ زانیاری هه‌واڵگری ورد به‌ستبوو .

له‌ حه‌ڤده‌ى مانگى ڕابردوو تیرۆریستانى داعش شارى ڕوومادى سه‌نته‌رى پارێزگاى ئه‌نباریان كۆنتڕۆڵكرد و هێزه‌ ئه‌منیه‌كان پاشه‌كشه‌یان له‌ شاره‌كه‌ كرد و به‌و هۆیه‌شه‌وه‌ ژماه‌یه‌ك زۆرى خه‌ڵكى كوژران و ئاواره‌ بوون .