سه‌رۆكی ڕه‌وتی سه‌در، له‌ دیدارێكی رۆژنامەڤانیدا ئاماژە بەوەدەکات کە" به‌ گه‌ڕانه‌وه‌ی سوپای ئه‌مریكا بۆ عێراق، سوپای مه‌هدی له‌دژیان سەرهەڵدەداتەوە"، هاوکات حكومه‌تی پێشووی عێراقی به‌ قوڵكردنه‌وه‌ی ململانێ تاییفییه‌كانی عێراق تۆمه‌تبار کرد و گوتیشی:" نابێ حەشدی شەعبی دەست لەکاروباری سیاسی عێراق وەربدات".

موقتەدا سەدر، سەرۆکی رەوتی سەدر هۆشدارییدا لەبارەی گەڕانەوەی سوپای ئەمریکا بۆ عێراق و گوتی:" هه‌ر كاتێك سوپای ئه‌مریكا بگه‌ڕێته‌وه‌ بۆ خاکی عیراق ، ئه‌وا سوپای مه‌هدی سه‌رهه‌ڵده‌داته‌وه‌و ده‌كه‌وێته‌ دژایه‌تیكردنی ئه‌مریكاییه‌كان"، له‌هه‌مانكاتیشدا ناڕه‌زایی ‌و دژایه‌تیی خۆشی پیشاندا بۆ پڕچه‌ككردنی كوردو سوننه‌و شیعه‌ له‌لایه‌ن ئه‌مریكاوه‌.

سەرۆکی رەوتی سەدر هەروەها گوتیشی:" قوڵبوونه‌وه‌ی كێشه‌ی تاییفی لەنێوان سوننه‌و شیعه‌ له‌عێراق، لە ئه‌ستۆی حكومه‌تی پێشووی عێراقە، بەتایبەت نووری مالیكی، کە خراپ وتووندڕه‌وانە مامەڵەی لەگەڵ پێکهاتەکانی دیکەی عێراق دەکرد".

موقتەدا سەدر ، لەبارەی حەشدی شه‌عبی دەڵێ " چه‌كدارانی حه‌شد له‌ژێر فه‌رمانی مه‌رجه‌عی شیعه‌دا کاردەکەن و دەجوڵێنەوە، بەڵام نابێ حه‌شدی شه‌عبی بە هیچ جۆرێک ده‌ست له‌كاروباری سیاسی عێراق وەربدات".










رووداو