قاسم سلێمانی جارێكی دیكە دەگەڕێتەوە عێراق
هەندێ لە ماڵپەڕە عەرەبییەكانی سەر بە میلیشیا شیعەكانی عێراق و ماڵپەڕی “دیگربان”ی نزیك لە سوپای پاسدارانی ئێران بڵاویان كردووەتەوە كەلە رۆژانی رباردوودا جارێكی دیكە “قاسم سلێمانی” فەرماندەی فەیلەقی “قودس” لقی دەرەوەی سوپای پاسدارانی ئێران بە چەك و چۆڵێكی زۆر و بەتایبەت مووشەكی “زلزال” گەڕاوەتەوە عێراق و لە پارێزگای ئەنبار لەگەڵ هێزەكانی حەشدی شەعبی دژ بە چەكدارانی داعش شەڕ دەكات.
ئەو ماڵپەڕانە ئاماژەیان بەوەش كردووە كە ئێران كۆمەڵێك مووشەكی جۆری “زلزال” و چەك و چۆڵێ دیكەی بۆ چەكدارانی حەشدی شەعبی ناردووە.
بەڕای كارناسانی سەربازی گەڕانەوەی دووبارەی قاسم سلێمانی بۆ عێراق و ناردنی چەك و چۆڵی نوێی ئێران بۆ عێراق، بەرەنجامی دانوستان و سەفەری ئەم دوایانەی “حوسێن دێهقان” وەزیری بەرگریی ئێران بووە لەگەڵ بەرپرسە باڵا سیاسی و سەربازییەكانی عێراق.
حوسێن دێهقان نزیك بە 10 رۆژ لەمەوپێش بۆ سەردانێكی عێراقی كرد و بۆماوەی یەك هەفتە لەگەڵ گەورە بەرپرسانی سیاسی و سەربازیی عێراق دیدار و چاوپێكەوتنی پێكهێنا.
ئەم سەفەرەی دێهقان پاش دەستبەسەردا گرتنی شاری “روومادی” لەلایەن داعشەوە رووی دا كە هەندێ لە بەرپرسانی ئێرانی باسیان لە خۆتەیا كردنی ئێران بۆ یارمەتیدانی عێراق دەكرد.
بەپێی هەڕەشە و لێدوانی گەورە بەرپرسانی سیاسی و سەربازیی ئێران پاش گرتنی روومادی لەلایەن داعشەوە ئێران ترسی لێ نێشتووە ئەو هێزە و شەڕەکانی عێراق نزیکی سنوورەکانی ئێران بکەوێتەوە، بۆیە بە بەردەوامی هەڕەسەی بەرەنگاربوونەوەی دەکەن.
پێشتریش و لە ماوەی چوار ساڵی رابردوودا هێزەكانی هێزەكانی قودس و سوپای پاسدارانی ئێران شان بەشانی سوپای سووریا لەدژی ئۆپۆزسیۆن و خەڵكی راپەڕیوی سووریا شەڕیان كردووە و ماوەی نزیك بە دوو ساڵیشە لە ناوچە شیعە نشینەكانی عێراقیش هێزەكانی سوپای پاسداران بە فەرماندەیی قاسم سلێمانی حزووریان هەیە.
هەتا ئێستە لە عێراق و سووریا و كۆمەڵێكی بەرچاو لە فەرماندە و هێزەكانی سوپای پاسداران كوژراون.
تەنیا لە رۆژانی رابردوودا بەهۆی تەقینەوەی داعش لە بنكەیەكی سەربازی لە ئەنبار 15 ئەندام و ئەفسەری سوپای پاسدارانی ئێران گیانیان لەدەست دا.
هەرچەند هەتا ئێستەش ئێران و ناوەندە سەربازییەكانی حاشا لە بوونی هێزی سەربازیی ئەو وڵاتە لە عێراق دەكەن و دەڵێن ئەو هێزانە راوێژكاری سەربازی و پارێزەری ناوەندە ئاینییەكانن.
باسنيوز
