فه‌رمانده‌یه‌كی باڵای سه‌ربازیی عێراق داوا له‌ دانیشتوانی شاری موسڵ ناوه‌ندی پارێزگای نه‌ینه‌وا ده‌كات، خۆیان بۆ شه‌ڕی گرتنه‌وه‌ی شاره‌كه‌یان ئاماده‌ بكه‌ن و ده‌شڵێت، له‌و شه‌ڕه‌ چه‌ك و كه‌ره‌سته‌ی پێشكه‌وتووی سه‌ربازیی جیهان به‌كار ده‌هێنرێت. لیوا نه‌جم جبووری فه‌رمانده‌ی ئۆپه‌ڕاسیۆنه‌كانی نه‌ینه‌وا ، له‌ په‌یامێكی ده‌نگیدا كه‌ له‌سه‌ر په‌یچی تایبه‌تی خۆی له‌سه‌ر تۆڕی كۆمه‌ڵایه‌تی فه‌یسبووك دایناوه‌، داوا له‌ دانیشتوانی شاری موسڵ ده‌كات، بۆ ده‌ستپێكردنی شه‌ڕی گرتنه‌وه‌ی شاره‌كه‌یان خۆیان ئاماده‌ بكه‌ن كه‌ زۆر نزیكبووه‌ته‌وه‌.

جبووری له‌ په‌یامه‌ ده‌نگییه‌كه‌دا ئه‌وه‌شى گووتوه‌: ئه‌و چه‌كه‌ پێشكه‌وتووانه‌ كه‌ له‌ وڵاتانی جیهان وه‌ك فڕۆكه‌ی جۆرى ئێف سى و پێنج ، ئێف بیست و دوو گه‌یشتوونه‌ته‌ عێراق له‌ شه‌ڕی گرتنه‌وه‌ی موسڵ به‌كار ده‌هێنرێن. له‌ كۆتاییشدا فه‌رمانده‌كه‌ ئاماژه‌ به‌وه‌ده‌كات، ئه‌وان له‌ لاوازكردن و له‌ناوبردنی چه‌كدارانی داعش تا ئه‌و كاته‌ی موسڵ رزگار ده‌كرێته‌وه‌ به‌رده‌وام ده‌بن. ئه‌مه‌ بۆ چه‌ند جارێكه‌ فه‌رمانده‌ باڵاكانی عێراق رایده‌گه‌یه‌نن كه‌ ده‌ستپێكردنی شه‌ڕی گرتنه‌وه‌ی موسڵ نزیكبووه‌ته‌وه‌ بێ‌ ئه‌وه‌ی ئاماژه‌ به‌ كات و ساته‌كه‌ی بكه‌ن.