شاندێکی باڵای پەرلەمانی عێراق بە سەرۆکایەتی ئارام شێخ محەممەد، جێگری سەرۆکی پەرلەمانی عێراق، لەكۆنگرەی وڵاتانی ناتۆ كە لەوڵاتی هەنگاریا بەڕێوەدەچێت، بەشداری دەکات و لە کۆنگرەکەش وتارێکی دەبێت.

ئێوارەی رۆژی 15-5-2015 شاندێکی باڵای پەرلەمانی عێراق بەسەرۆكایەتی ئارام شێخ محەممەد، جێگری سەرۆكی پەرلەمان و ئەندامێتی هۆشیار عەبدوڵڵا و ئەسكەندەر وتوت ئەندامانی لێژنەی ئاسایش و بەرگریی لە پەرلەمانی عێراق گەیشتە شاری (بوداپێست) پایتەختی وڵاتی هەنگاریا بەمەبەستی بەشداریكردن لەكۆنگرەی وڵاتانی هاوپەیمانی ئەتڵەسی باکوور( ناتۆ ).

نووسینگەی رۆژنامەوانیی جێگری سەرۆكی پەرلەمانی عێراق رایگەیاند " ئامانجی کۆنگرەکە هەڵسەنگاندنی كێشەكانی جیهان بەگشتی و دۆخی ئاڵۆزی ناوچەی خۆرهەڵاتی ناوەڕاست و ئەو ئاستەنگانەیە، كە رووبەڕووی رێكخراوەكەو ئاسایشی جیهان بۆتەوە، بەهۆی مەترسی ‌و هەڕەشەكانی تیرۆر" .

لەكۆنگرەكەدا، ئارام شێخ محەممەد باسێك لەبارەی ناسەقامگیری لە رۆژهەڵاتی ناوەڕاست و ئاستەنگ و هەڕەشەكانی تیرۆر لەسەر عێراق و ناوچەكە دەخاتەڕوو.

كۆنگرەكە تاوەکو رۆژی 16 و 17 و 18-5-2015 بەردەوامیی دەبێت، كارەكانی سێ‌ رۆژی كۆنگرە لە رێگەی 5 لێژنەی هەمیشەیی ناتۆوە بەڕێوەدەچێت، كە ئەوانیش لێژنەكانی(رەهەندی مەدەنی، ئاسایش و بەرگری، ئاسایش و ئابووری، سیاسی، زانست و تەكنەلۆجیا).

هەریەك لەم لیژنانە راپۆرتی تایبەتی خۆیان دەبێت سەبارەت بەچۆنیەتی مامەڵەكردن لەگەڵ گۆڕانكارییە نوێیەكان و گەڵاڵەكردنی ئالییەتی نوێی رووبەڕووبوونەوەی مەترسییەكان لەسەر هەریەك لەم ئاستانە.







رووداو