ئۆپه‌ڕاسیۆنى كۆنتڕۆڵكردنه‌وه‌ى پارێزگاى ئه‌نبار له‌ ده‌ستى چه‌كدارانى تیرۆریستى داعش به‌رده‌وامى هه‌یه‌ و فیڕقه‌ى ئاڵتونیش ده‌ڵێت زیانى زۆریان به‌ داعش گه‌یاندووه‌ و پاشه‌كشه‌یان پێكردوون. له‌و باره‌وه‌ سه‌رچاوه‌كانى هه‌واڵ له‌ سه‌ر زارى عه‌مید عه‌بدولئه‌میر خه‌زره‌جى جێگرى فه‌رمانده‌ى فیڕقه‌ى ئاڵتونى ڕایگه‌یاند كه‌ دواى ئه‌وه‌ى داعش هێرشى كرده‌ سه‌ر شارى ڕوومادى به‌رپه‌رچمان دانه‌وه‌ و توانیمان زیانى زۆر به‌ داعش بگه‌ینین و هه‌روه‌ها به‌ره‌و ده‌ره‌وه‌ى شارى ڕوومادى پاشه‌كشه‌مان پێكردن.

عه‌مید عه‌بدولئه‌میر خه‌زره‌جى جێگرى فه‌رمانده‌ى فیڕقه‌ى ئاڵتونى ڕاشیگه‌یاندووه‌ كه‌ ئه‌وان وه‌ك فیڕقه‌ى ئاڵتونى تاوه‌كو ڕزگاركردنى ته‌واوه‌تى پارێزگاى ئه‌نبار له‌ ناوچه‌كه‌دا ده‌مێننه‌وه‌. له‌ لایه‌كى دیكه‌وه‌ عه‌زال عه‌بید زاجى ئه‌ندامى ئه‌نجوومه‌نى پارێزگاى ئه‌نبار ڕایگه‌یاند كه‌ داعش له‌ ته‌واوى قۆڵه‌كانه‌وه‌ هێرشى كرده‌ سه‌ر ڕوومادى، به‌ڵام هێزه‌ ئه‌منیه‌كان توانیان وه‌ڵامى توندى ئه‌و هێرشه‌ى داعش بده‌نه‌وه‌ و هه‌روه‌ك ناوبراو داواى ناردنى پێداویستى و هێزى زیاترى بۆ پارێزگاكه‌یان كرد، ئه‌مه‌ش به‌ هۆى به‌رفراوانبوونى ڕِووبه‌ڕى شه‌ڕوپێكدادانه‌كان له‌گه‌ڵ داعش له‌ناوچه‌كه‌دا.