سەرۆككۆماری عێراقی فیدڕاڵ رایگەیاند، ئەگەر لە نێوان مانەوەی بەشار ئەسەد و كەوتنی سووریا بەدەست گرووپە چەكدارەكان سەرپشك بكرێین، ئێمە مانەوەی ئەسەد لە دەسەڵات هەڵدەبژێرین.

لە چاوپێكەوتنێكیدا لەگەڵ كەناڵی جەزیرە، فوئاد مەعسوم، سەرۆککۆماری عێراق رایگەیاند، "فراوانبوونی دەسەڵاتی گرووپە چەكدارەكان تەنها زیان بە سووریا ناگەیەنێت، بەڵكو زیان بە عێراق و هەموو وڵاتانی ناوچەكە دەگەیەنێت، بۆیە مانەوەی ئەسەد مەترسی كەمترەو دەبێ ئەم كێشەیەش لە رێگەی سیاسییەوە چارەسەربكرێت".

لەبارەی شەڕی هاوپەیمانی نێودەوڵەتی دژی داعش لە عێراق، سەرۆككۆماری عێراق رایگەیاندووە، کە "دەتوانرێت لەهەندێك ناوچە سەركەوتنی یەكلاكەرەوە بەدیبێنن، بەڵام لە شارێكی وەكو موسڵ سەختترە، چونكە چەكدارانی داعش لەگەڵ دانیشتووانی شارەكە پەیوەندییان دروستكردووە و تێكەڵبوونە، ناشكرێت لە رێگەی ئاسمانەوە بەردەوام بۆردوومان بكرێت، چونكە ژمارەیەكی زۆری خەڵكی مەدەنی دەبنە قوربانی".

لەبارەی هەژموونی ئێرانیشەوە بەسەر عێراق، فوئاد مەعسوم گوتی: "ئێران دراوسێی عێراقە و زیاتر لە 1000 كیلۆمەتر سنوور بەیەكەوە دەمانبەستێتەوە و پەیوەندییەكانیشمان هەمیشە باشبوون، هەروەها ئێران یەكەم وڵات بوو لەشەڕی داعش هاوكاری عێراقی كردوو".

سەبارەت بە دۆسیەی ئاشتەوایی نیشتمانیشەوە، سەرۆككۆماری عێراق رایگەیاند: "ئاشتەوایی نیشتمانی دروشمی هەموو عێراقییەكانە، لەو رۆژەی وەكوسەرۆككۆماریش سوێندم خواردووە، هەمیشە جەختم لەسەرگرنگی كاركردن لەسەر جێبەجێكردنی ئاشتەوایی نیشتمانی كردووەتەوە".

سەرۆككۆماری عێراق ستایشی هەوڵەكانی حەیدەر عەبادی، سەرۆكوەزیرانی عێراقی لە بواری ئەمنییەوە كرد و ئاماژەی بە هەڵوەشاندنەوەی بڕیاری قەدەغەكردنی هاتوچۆدا، كە چەند ساڵێكە لە بەغدا گیراوەتەبەر.








رووداو