ئامادەکاری گەورە بۆ کۆنترۆڵکردنەوەی شاری مووسڵ دەكرێت، گوتەبێژی سەرۆکوەزیرانی عێراقیش رایدەگەیەنێت" فەرماندەیەکی تایبەت دانراوە، بۆ سەرپەرشتیکرنی ئۆپەراسیۆنی کۆنترۆڵکردنەوەی ئەو شارە.

سەعد حەدیسی، گوتەبێژی حەیدەر عەبادی ئەمڕۆ سێشەممە 17-2-2015 رایگەیاند:" سەرۆکوەزیرانی عێراق ئامادەکاری گەورەی بۆکۆنترۆڵکردنەوەی شاری مووسڵ کردووە، هەروەها بەر لە دوومانگ فەرماندەیەکی داناوە بۆ سەرپەرشتیکردنی ئۆپەراسیۆنی کۆنترۆڵکردنەوەی ئەو شارە".

حەدیسی هەروەها گوتی:" سەرۆکوەزیرانی عێراق جەختدەکاتەوە لە سەرکەوتنی ئۆپەراسیۆنی کۆنترۆڵکردنەوەی مووسڵ، هەروەها نایەوێت کەسانی سڤیل ببنە قوربانی شەڕی سەختی نێوان هەردوولا".

حەیدەر عەبادی، سەرۆکوەزیرانی عێراق لە هەڤپەیڤینێکدا لەگەڵ BBC دوێنێ دووشەممە 16-2-2015 رایگەیاند " لەکاتی کۆنترۆڵکردنەوەی مووسڵدا، هێزەکانی پۆلیس کاروباری ناوچەکە لە جێگەی هێزە ئەمنییەکان بەڕێوەدەبەن، ئەمەش بۆ ئەوەیە کێشە لە شارەکەدا دروست نەبێت".