چەكدارەکانی داعش ١٢٠ کەسی سەر بە دوو هۆزی عەرەبی سووننەیان لە ناوچەیەكی سەر بە تكریت لە سنووری پارێزگای سەلاحەدین رفاند.



ئەنجوومەنی پیرانی هۆزەكانی سەلاحەدین لە ڕاگەیەندراوێک دا كە كۆپییەكی گەیشتۆتە ئاژانسی هەواڵی پەیامنێر ڕایگەیاند؛ دوێنێ‌ دووشەممە(١٦/٢/٢٠١٥) چەكدارەکانی داعش هەڵیانكوتاوەتە سەر گوندی "ئەلرەبیزە"ی سەر بە شارەدێی عەلەم لە سنووری شاری تكریتی ناوەندی پارێزگای سەلاحەدین و ١٢٠ كەسیان لە گوندەکە لە گەڵ خۆیان بردووە کە سەر بە دوو هۆزی "عوبێد" و "مەسارە"ن.



لە ڕاگەیەنراوەکە دا ئەنجوومەنی پیرانی هۆزەكانی سەلاحەدین، ترس و نیگەرانی خۆیان لەوە دەردەبڕن کە چەكدرەکانی داعش هاوشێوەی هۆزەكانی "ئەلبونەمر" و "ئەلبو فەهد" و "جبور" و هۆزەكانی دیكە ئەم كەسانەش بە دڕندەترین شێوە لە ناو ببەن و داوا لە حكوومەتی عێراق دەكەن لە رزگار كردنی پارێزگای سەلاحەدین و ڕاماڵینی چەكدارانی داعش لەو پارێزگایە پەلە بکات.