مەحموود سەرخی، یەكێك له ‌مەرجەكانی شیعەی عێراق پێیوایە رژێمی ئێران زووتر لە رژێمی سووریا و شاری موسڵ دەكەوێت بەدەستی چەكدارانی داعش. ئەو كە دژی مەرجەعی باڵای شیعەكانی عێراق عەلی سیستانییە پەیامێكی دژ بە فتواكەی سیستانی دەدات و ئاماژە بە سەربڕینی سەدر و مالیكی دەكات بە فەرمانی ئیمام مەهدی.

سەرخی له ‌پەیامێكدا پێشبینی دەكات هاوپەیمانێتی نێودەوڵەتی دژی داعش بەسەرۆكایەتی ئەمریكا شكست بهێنێت و هۆشداری دەداتە سوننەكان كە نەچنە ریزەكانی سەحوەوە.

سەبارەت بە فتواكەی عەلی سیستانی گەورە مەرجەعی شیعەكان بۆ رووبەڕووبوونەوەی چەكدارانی داعش، سەرخی دەڵێت: "فتواكە بە مردوویی لەدایكبووه"‌و پێیوایە پێكهێنانی حەشدی شەعبی كە ئەو به "‌حەشدی تائیفی" ناوی بردووە‌ رۆڵی هەبووە لە دابەشكردنی عێراق و هەڵگیرسانی شەڕ لەنێوان مسوڵماناندا.

سەرخی هێرشێكی توند دەكاتە سەر نووری مالیكی جێگری سەرۆككۆماری عێراق و هۆشداریدا لەوەی كە هەوڵدەدات جارێكی دیكە ببێتەوە بە سەرۆكوەزیران.

چەند رۆژێك پێش ئێستاش له ‌بەیاننامەیەكدا سەرخی رایگەیاندبوو، "ئیمام مەهدی مونتەزەر فەرمانی پێدوام سەری نووری مالیكی و موقتەدا سەدری سەرۆكی رەوتی سەدر ببڕم". سەرخی ئەو دووانەش تۆمەتبار دەكات بە تێكدانی ماڵی شیعەكان لەپێناو دەستگرتن و خۆشەویستییان بۆ دونیا.

دەشڵێت: "سەدرو مالیكی هیچ خزمەتگوزارییەكیان پێشكەشی هاووڵاتیان نەكردووەو هەموو هەوڵێكیانداوە بۆ تێكدانی ماڵی شیعە". داواش له ‌گەلی عێراق دەكات هەموو هەفتەیەك خۆپیشاندان بكەن و دروشمی "نا بۆ خیانەتكاران" بەرزبكەنەوە.







رووداو