فەرماندەیی پۆلیسی ئیتحادی عێراق لە بەیاننامەیەكدا كوژرانی بەرپرسێكی خۆی لە سنووری پارێزگای سەڵاحەدین راگەیاند، ''بەهۆی تەقینەوەیەكی خۆكوژی لەڕێگەی تانكەرێكی پڕ لە تەقەمەنی بە هێزەكانی پۆلیسی ئیتحادی لە قەزای بێجی، فەیسەڵ مالیك ئەلزاملی، فەرماندەی پۆلیسی ئیتحادی تكریت و ژمارەیەك پۆلیسی دیكە كوژران''.

ئێوارەی رۆژی هەینی 7ـی تشرینی دووەمی 2014، تانكەرێكی پڕ لە تەقەمەنی، كە خۆكوژێك لێیدەخوڕی، لەگەڕەكی پیشەسازی بێجی خۆی بە هێزەكانی پۆلیسی ئیتحادی تەقاندەوە و لە ئەنجامدا فەیسەڵ مالیك ئەلزاملی و چەندین پۆلیسی دیكە كوژران و زەرەر و زیانێكی زۆر بەر ناوچەكە كەوت.

سوپای عێراق لە دوو هەفتەی رابردوو چەند ناوچەیەكی لە سنووری پارێزگای سەڵاحەددین لەدەست چەكدارانی داعش دەرهێنایەوەو یەكێك لەو قەزایانە بێجی بوو، ئێستا سوپای عێراق لە هەوڵدایە هێڵی سەرەكی نێوان بێجی و تكریت كۆنتڕۆڵبكاتەوە.







رووداو