ئەمڕۆ یەكشەممە شاندێكی كۆمكاری عەرەبی سەردانی بەغدا دەكات و سبەی شاندێكی باڵای حكو‌مەتی عێراقیش سەردانی ئێران دەكات.

بڕیارە ئەمڕۆ شاندێكی كۆمكاری عەرەبی بە سەرۆكایەتی شێخ سوباح خالید حەمەد ئال سوباح وەزیری دەرەوەی كوەیت وەك سەرۆكی نۆبەتی 25مین خولی كۆمكاری عەرەبی و ئەندامێتی ئەحمەد ولد تەكدی وەزیری دەرەوەی مۆریتانی و نەبیل عەرەبی سەرۆكی كۆمكاری عەرەبی سەردانی بەغدا دەكەن.

سەرۆكی كۆمكاری عەرەبی رایگەیاند: "وڵاتانی عەرەبی و عێراق بەجدیی دەیانەوێت كار بۆ نەهیشتنی تیرۆر بكەن و بڕیاریانداوە كە رووبەڕووی هەڕەشەكانی داعش ببنەوە".

نەبیل عەرەبی گوتیشی: "شاندەكەی كۆمكاری عەرەبی لەگەڵ هەریەك لە فوئاد مەعسووم سەرۆككۆماری عێراق، حەیدەر عەببادی سەرۆك وەزیران و رۆژ نووری شاوێس جێگری سەرۆك وەزیران و ئیبراهیم جەعفەری وەزیری دەرەوەو بەرپرسانی دیكەی عێراق كۆدەبێتەوە، بۆ گفتوگۆكردن لەسەر پێداویستییەكانی عێراق بۆ شەڕی تیرۆر".

لەلایەكی دیكەوە بڕیارە سبەی دووشەممە شاندێكی باڵای حكومەتی عێراقی بە سەرۆكایەتی حەیدەر عەببادی و چەند وەزیرێك سەردانی ئێران بكەن بۆ گفتۆگۆكردن لەگەڵ بەرپرسانی باڵای ئێرانی.

هەریەك لە عادل عەبدولمەهدی وەزیری نەوت و قاسم فەهداوی وەزیری كارەبا و مەلاس محەممەد كەسنەزانی وەزیری بازرگانی یاوەری عەببادی دەكەن.







رووداو