له‌كاتێكدا وڵات به‌ قۆناغیكی سه‌خت و هه‌ستیار تێده‌په‌رێت ، به‌رێز سه‌رۆك كۆمار كار بۆ جێبه‌جێكردن و پاراستنی ده‌ستوور و یه‌كێتی وڵات و بنه‌مای ته‌وافوق له‌نێوان پێكهاته‌كان ده‌كات ، نوری مالكی سه‌رۆكی كۆتایی هاتووی ویلایه‌تی ئه‌نجومه‌نی وه‌زیرانی ئیتیحادی به‌یاننامه‌یه‌كی له‌ شه‌وی 10 له‌ سه‌ر 11ی ئاب بلاوكرده‌وه‌ كه‌ فوئاد مه‌عسوم سه‌رۆك كۆماری عێراقی تۆمه‌تباركرد به‌ پێشێلكردنی ده‌ستوور ، كه‌ وه‌ك ئاشكرایه‌ خۆی ماوه‌ی چه‌ندین ساڵه‌ و بۆ چه‌ند جارێكیش ده‌ستووری پێشێلكردووه‌ و ئه‌م پێشێلكردنه‌شی هه‌موو ئه‌و پێشهاتانه‌ی لێكه‌وته‌وه‌ كه‌ وڵاتی گه‌یاندۆته‌ بارودۆخێكی كاره‌ساتدار .

ئێمه‌ له‌ هاوپه‌یمانی كوردستانی پشتگیری هه‌وڵه‌كانی فوئاد مه‌عسوم سه‌رۆك كۆمارو شه‌رعیه‌تی ده‌ستووری ده‌كه‌ین ، بۆیه‌ به‌هه‌موو شێوه‌یه‌ك ئه‌و تۆمه‌تانه‌ بێ بنه‌مایانه‌ی مالكی ره‌تده‌كه‌ینه‌وه‌ و به‌ چاوێكی گومانه‌وه‌ سه‌یری ئه‌و جوله‌ سه‌ربازییانه‌ی هێزه‌ سه‌ربازی و ئه‌منییه‌كان له‌ به‌غدا و ده‌وروبه‌ری باره‌گا سه‌ره‌كییه‌كانی سه‌رۆكایه‌تی و شوێنه‌كانی دیكه‌ ده‌كه‌ین كه‌ بۆنی كوده‌تای به‌ سه‌ر شه‌رعیه‌ت و ده‌ستوور لێده‌كرێت ، هۆشداری ئه‌وه‌ش له‌و ره‌فتاره‌ و له‌ ده‌رهاوێشته‌ و ده‌ره‌نجامه‌ مه‌ترسیداره‌كان بۆ سه‌ر ئاینده‌ی وڵات و یه‌كێتی ده‌ده‌ین .