نووری مالیكی سەرۆكوەزیرانی كاربەڕێكەری عێراق وتاری هەفتانەی خۆی لە ئەنجوومەنی وەزیرانەوە لە شاری بەغدا پێشكەشكرد. ئەو باسی لە پێكهێنانی حكومەتی عێراق و دۆخی ئەمنیی عێراق و ناوچەكە كرد.

سەبارەت بە پرسی پێكهێنانی حكومەتی عێراق، مالیكی گوتی "دەبێ لە دانیشتنی سبەینێی ئەنجوومەنی نوێنەراندا كاندیدی گەورەترین فراكسیۆن راسپێردرێت بۆ پێكهێنانی حكومەت". جەختیشیكردەوە "دەبێت لە چوارچێوەی دەستوور پرۆسەكە بەڕێوەبچێت و بەدەر لەوە هیچ رایەكی دیكە قبوڵ ناكەین".

بەشێكی دیكەی وتارەكەی مالیكی تایبەت بوو بە دۆخی ئەمنیی عێراق ‌و گوتی "ئێمە ماوەیەكە هۆشداریی دەدەین لە مەترسییەكانی داعش و ئێستاش دەیڵێینەوە كە داعش جێی مەترسییە لە چەند وڵاتێك، ئەجێندای ئەو رێكخراوە هەڕەشەیە بۆ سەر هەموو موسڵمانان".

مالیكی داوایكرد كۆدەنگییەك هەبێت بۆ رووبەڕووبوونەوەی داعش و گوتی "داعش بەتەنیا هەڕەشە نییە بۆ سەر عێراق و سووریا، بەڵكو هەڕەشەیە بۆ سەر ناوچەكە و وڵاتانی دراوسێ، جێی مەترسییە بۆ سەر شەبەك و ئێزدی".

مالیكی ئاماژەی بە هاوكاریكردنی بەپەلەی ئەو خەڵكە كرد، كە لە دەستی داعش هەڵاتوون و گوتیشی "دەبێت كاربكەین بۆ پڕچەككردنی خەڵكی ئەو شوێنانەی داعش بووەتە هەڕەشە لەسەریان".

مالیكی چەند وڵاتێكی ناوچەكەی تۆمەتبار كرد بە هاوكاریكردن و پشتگیریكردنی عێراق و گوتی "وڵاتانی ناسراون"، بەڵام لەنێویاندا تەنیا ناوی ئیسرائیلی هێناو گوتی "ئیسرائیل دوور نییە لەو وڵاتانەی هاوكاریی داعش دەكەن و داعشیش باشترین خزمەتی ئیسرائیلی كردووە".








رووداو