بەپێی ئامارێکی فیدراسیۆنی سەرتاسەری پەنابەرانی عێراقی لەهەرێمی کوردستان زیاتر لە سی هەزار پەنابەری عێراقی لە دەرەوەی ووڵات لەژێر هەڕەشەی بەزۆر ناردنەوەدان،ئۆباڵەکەشی لە ئەستۆی حکومەتی ناوەندی عێراقە.


بەرپرسی فیدراسیۆنی سەرتاسەری پەنابەرانی عێراقی لەهەرێمی کوردستان"ئامانج عەبدوڵا"لەلێدوانێکی تایبەت بۆ ئاژانسى پەیامنێر گووتی:"بەهۆی ئەو ڕێکەوتن و پرۆتۆکۆڵانەی حکومەتی عێراق لەسەر پرسی پەنابەران لەگەڵ ووڵاتانی ئەوروپا ئەنجامی داوە، لە ئێستادا زیاتر لە سی هەزار پەنابەری عێراقی کە زۆرینەیان کوردن لەژێر هەڕەشەی بەزۆر ناردنەوەدان".



گووتیشی:"حکومەتی بەغداد پرسی پەنابەران وەکو کارتێکی سیاسی بەکاردێنێت و یاری بە ژیانی پەنابەران دەکات، چونکە ئەو پەنابەرانە له شوێنەکانی خۆیان زۆر شتیان لەدەست داوە تاکو گەیشتونەتە ووڵاتانی ئەوروپا".



بەرپرسەکەی فیدراسیۆنی سەرتاسەری پەنابەران عێراق داوای لە پەرلەمان و سەرۆکایەتی هەرێم و حکومەت کورد فشارەکانیان بۆ سەر حکومەتی ناوەندی چڕبکەنەوە تاکو بەغداد ناچار بێت سەرجەم ئەو ڕێکەوتن و پرۆتۆکۆڵانە هەڵبوەشێنێتەوە کە ئەنجامى داوە بۆ بەزۆر ناردنەوەی پەنابەران".