فه‌رمانه‌كه‌ی باراك ئۆباما سه‌رۆكی ویلایه‌ته‌ یه‌كگرتووه‌كانی ئه‌مریكا بۆ ره‌وانه‌كردنی ٣٠٠ سه‌رباز بۆ عێراق جێبه‌جێكراو ژماره‌یه‌ك سه‌رباز و چه‌ند هێلیكۆپته‌ر و فڕۆكه‌یه‌كی بێ فڕۆكه‌وان گه‌یشتوونه‌ته‌ به‌غدا.



وه‌زاره‌تی به‌رگری ئه‌مه‌ریكا (په‌نتاگۆن) رایگەیاند؛ ٣٠٠ سه‌رباز و ژماره‌یه‌ك هێلیكۆپته‌ر و فڕۆكه‌ی بێ فڕۆكه‌وان ڕەوانەی بەغدا کراون.



سه‌رچاوه‌كانی هه‌واڵ پێیانوایه‌ ئه‌و سه‌ربازانه‌ی ئه‌مریكا ره‌وانه‌ی به‌غدای كردوون بۆ شه‌ڕ نییه‌، به‌ڵكو بۆ پاراستنی ئاسایشی باڵیۆزخانه‌ی ئه‌مریكا و دامه‌زراوه‌كان و فڕۆكه‌خانه‌ی نێوده‌وڵه‌تی به‌غدایە.



ئاژانسی هه‌واڵی رۆیته‌رز بڵاویكردۆته‌وه‌ دوێنێ دووشه‌ممه‌ ٢٠٠ سه‌ربازی ئه‌مریكی له‌ رێگه‌ی فڕۆكه‌خانه‌ی به‌غدا گه‌یشتنه‌ عێراق و ئه‌ركیشیان پاراستنی ئاسایشی باڵیۆزخانه‌ی ئه‌مریكا و فڕۆكه‌خانه‌ی نێوده‌وڵه‌تی به‌غدا و چه‌ند دامه‌زراوه‌یه‌كی دیكه‌ ده‌بێت.



فه‌رمانده‌یه‌كی سوپای ئه‌مریكی كه‌ نه‌یوستووه‌ ناوی بڵاوبكرێته‌وه‌ بە ئاژانسی رۆیته‌رزی ڕاگەیاند: ئه‌و جموجۆڵه‌ سه‌ربازییه‌ی ئێستاكه‌ له‌ عێراقدا گیراوه‌ته‌وه‌ به‌ر ته‌نیا بۆ پاراستنی گیان و ژیانی ئه‌و ئه‌مریكاییانه‌یه‌ كه‌ له‌ عێراقدان.



ئه‌دمیرال جۆن كێربی، گوته‌بێژی وه‌زاره‌تی به‌رگری ئه‌مریكا ڕایگەیاند؛ بۆ ئاماده‌كاری پاراستنی ئاسایشی باڵیۆزخانه‌ و فڕۆكه‌خانه‌ی نێوده‌وڵه‌تی به‌غدا و دامه‌زراوه‌كانی، ڕۆژی یه‌كشه‌ممه‌ ٢٠٠ سه‌ربازی ئەمریکی گه‌یشتوونه‌ته‌ بەغدا.



هەروەها گووتی:‌ له‌م نزیكانه‌ ١٠٠ سه‌ربازی دیكه‌ش به‌ مه‌به‌ستی پشتیوانی لۆجستی ده‌گه‌نه‌ به‌غدا.



سه‌باره‌ت به‌ پاراستنی فڕۆكه‌خانه‌ی به‌غدا، گوته‌بێژی په‌نتاگۆن پێیوایه‌ فڕۆكه‌خانه‌ خاڵێكی گرنگه‌ به‌ تایبه‌ت كه‌ ناوه‌ندێكی چالاكی گواستنه‌وه‌یه‌.