رۆبه‌رت كۆلفیل گوته‌بێژ به‌ ناوى نووسینگه‌ى نه‌ته‌وه‌ یه‌كگرتووه‌كان بۆ مافی مرۆڤ له‌ شاری جنێڤ به‌ رۆژنامه‌نووسانی راگه‌یاند كه‌ له‌ پێنج تا بیست و دووى ئه‌م مانگه‌ پتر له‌ هه‌زار كه‌س له‌ عیراق كوژراون له‌وه‌تاى چه‌كداره‌كانی داعش چه‌ند شارێكیان له‌و وڵاته‌ كۆنترۆلأ كردووه‌. كۆلفیل روونی كرده‌وه‌ كه‌ له‌و ماوه‌یه‌دا هه‌زارو حه‌فتاو پێنج كه‌س كوژراون و نزیكه‌ى شه‌ش سه‌دو په‌نجاو هه‌شت كه‌سی دیكه‌یش برینداربوونه‌.

پێداگیری له‌سه‌ر ئه‌وه‌یش كرد كه‌ ئه‌و ئاماره‌ نزمترین ئاستى كوژراوه‌كان ده‌نوێنێت. له‌لایه‌كی دیكه‌وه‌ له‌ ئاكامی بۆردومان كردنی چه‌ند گه‌ڕه‌كێكی شارى بێجی له‌لایه‌ن فڕۆكه‌ جه‌نگییه‌كانی عیراقه‌وه‌ نۆزده‌ كه‌س كوژران نۆیان ئافره‌ت و ده‌یان منداڵن هاوكات حه‌ڤده‌ ئافره‌ت و منداڵى دیكه‌یش برینداربوون. لاى خۆیه‌وه‌ به‌رپرسێكی ئه‌منی عیراق رایگه‌یاند كه‌ ئه‌و بۆردومانه‌ مۆڵگه‌ى چه‌كداره‌كانی داعشی كردبووه‌ ئامانج و له‌ ئاكامدا نۆزده‌ چه‌كدارى داعش كوژراون.