چه‌كداره‌كانی داعش ئه‌و زیندانیانه‌یان ئازادكرد كه‌ پێشتر له‌ گرتووخانه‌كانی شاری موسڵ ده‌ستگییركرابوون دوای كۆنترۆڵكردنی سه‌رجه‌م شاره‌كه‌ له‌لایه‌ن داعش له‌ شه‌وی رابردوه‌وه‌.

سه‌رچاوه‌یه‌كی ئاگادار به‌سۆمه‌ریه‌ نیوزی راگه‌یاند،" ژماره‌ی ئه‌و زیندانیانه‌ی له‌لایه‌ن داعش ئازاد كراون له‌ گرتووخانه‌ی بادوش له‌ موسڵ زیاتر له‌ هه‌زار و 400 كه‌س ده‌بن".

سه‌رچاوه‌كه‌ ئه‌وه‌شی خسته‌ڕوو،" دوای ده‌ستگرتن به‌سه‌ر گرتووخانه‌ی بادوش ( 20 كیلۆمه‌تر خۆرئاوای موسڵ) له‌لایه‌ن چه‌كداره‌كانی داعش، سه‌رجه‌م ده‌ستگییركراوه‌كانی ئه‌و گرتووخانه‌یه‌ هه‌ڵهاتوون"، وتیشی: زیندانیه‌كانی به‌ره‌وشوێنی نادیار رۆیشتوون هاوكات له‌گه‌ڵ ئه‌و دۆخه‌ ئه‌منیه‌ ناجێگیره‌ی سه‌رجه‌م ناوچه‌كانی پارێزگای نه‌ینه‌وای گرۆته‌وه‌.

هاوكات هه‌ر ئه‌مڕۆ سێشه‌ممه‌( 10 / حوزه‌یران / 2014) سه‌رچاوه‌یه‌كی پۆلیسی نه‌ینه‌وا ئاشكرایكرد،" چه‌كداره‌كانی داعش گرتووخانه‌كانی بادوش و ته‌سفیرات و به‌ره‌نگاربوونه‌وه‌ی تیرۆریان كۆنترۆڵكردووه‌ له‌شاری موسڵ و به‌وهۆیه‌وه‌ به‌سه‌دان ده‌ستگییركراوی ناو ئه‌و گرتووخانانه‌ هه‌ڵهاتوون".

له‌رۆژی یه‌كشه‌ممه‌وه‌ چه‌كداره‌كانی داعش په‌لاماری شاری موسڵ ده‌ده‌ن و له‌شه‌وی رابردوه‌وه‌ توانیویانه‌ سه‌رجه‌م شاره‌كه‌ كۆنترۆڵ بكه‌ن و به‌وهۆیه‌وه‌ سه‌رجه‌م داموده‌زگاكانی شاره‌كه‌ په‌كیان كه‌وتووه‌، هه‌روه‌ك ژماره‌یه‌كی بێشومار له‌ هاوڵاتیانی شاره‌كه‌ به‌ره‌و هه‌رێمی كوردستان و ناوچه‌كانی دیكه‌ ئاواره‌بوون.









خه‌ندان