لیستی مواتن ئاماده‌یی پیشاندا، عه‌ممار حه‌كیم سه‌رۆكی لیسته‌كه‌ رۆڵی ناوبژیوان ببینێت له‌نێوان به‌غداو هه‌رێم بۆ چاره‌سه‌ركردنی جیاوازییه‌كانیان له‌سه‌ر مه‌سه‌له‌ی نه‌وت، گه‌ر هه‌ردوولا قایلبن پێی.

به‌لیغ ئه‌بو كه‌له‌ك، وته‌بێژی لیستی مواتن به‌خه‌ندانی راگه‌یاند،" هه‌ر ناوبژیوانیه‌ك بۆ چاره‌سه‌ری گرفته‌كان پێویستی به‌ره‌زامه‌ندی هه‌ردوو خاوه‌ن كێشه‌كه‌ هه‌یه‌"، وتیشی: ناوبژیوانیكردنه‌كه‌ هیچ ئاكامێكی نابێت، گه‌ر لایه‌ك قایل بێت و لایه‌كه‌ی دیكه‌ ره‌تی بكاته‌وه‌.

به‌لیغ ئه‌وه‌شی خسته‌ڕوو،"حه‌كیم ئاماده‌یه‌ بكه‌وێته‌ نێوان هه‌رێم و به‌غدا بۆ چاره‌سه‌ری كێشه‌كانی نێوانیان و به‌رده‌وام كار له‌سه‌ر به‌یه‌كگه‌یاندنی لایه‌نه‌ جیاوازه‌كان ده‌كات و هه‌رده‌م ده‌ستپێشخه‌ره‌ بۆ هێوركردنه‌وه‌ی بارگرژییه‌كان"، وتیشی: هێشتا هه‌رێم و به‌غدا رای خۆیان له‌ باره‌ی ناوبژیوانیی كردنی حه‌كیم له‌نێوانیان نه‌داوه‌.

چاودێرانی سیاسی وای بۆ ده‌چن له‌كۆبوونه‌وه‌ی ئه‌م دواییه‌ عه‌ممار حه‌كیم سه‌رۆكی لیستی مواتن و رۆژ نوری شاوه‌یس جێگری سەرۆک وەزیرانی عیراق بۆ کاروباری ئابوریی، مه‌سه‌له‌ی قه‌یرانی نه‌وتی هه‌رێم و به‌غدا و چۆنێتی چارسه‌ركردنی باسیان لێوه‌كراوه‌.






خه‌ندان