وه‌زاره‌تى نه‌وت عێراق له‌ نوێترین لێدوانى له‌باره‌ى پرۆسه‌ى فرۆشتنى نه‌وتى هه‌رێمى كوردستان له‌ رێگه‌ى به‌نده‌رى جه‌یهانى توركیاوه‌ رایگه‌یاند كه‌ توركیا پێشێلى رێككه‌وتنى نێوانیانی كردووه‌ له‌ به‌رامبه‌ریشدا توركیا ده‌لێت نه‌وتی هه‌رێمی كوردستان به‌پێی ده‌ستور ده‌فرۆشرێت .

عاسم جیهاد گووته‌بێژى وه‌زاره‌تى نه‌وتى عێراق رایگه‌یاند توركیا پێشێلى رێككه‌وتنى نێوانمانى كردووه‌ كه‌ رێگاى داوه‌ به‌ هه‌رێمى كوردستان نه‌وت له‌ به‌نده‌رى جه‌یهاندا خه‌زن بكات و هه‌نارده‌ى بكات گووتیشى له‌سه‌ر ئه‌م كاره‌ سكاڵامان له‌سه‌ر توركیا له‌ دادگاى ئاى سی سی له‌ پاریس تۆمار كردووه‌ .

جیهاد ئه‌وه‌یشى گووت كه‌ به‌پێى ئه‌و رێكه‌وتنه‌ى له‌گه‌ڵ توركیا هه‌یانه‌ ته‌نها كۆمپانیای سۆمۆ ده‌توانێت نه‌وت هه‌نارده‌ بكات و توركیا ته‌نها ئاسانكارى گواستنه‌وه‌ ده‌كات و كرێ وه‌رده‌گرێت و توركیا مافی نییه‌ ده‌ستوورمان بۆ ته‌فسیر بكات .

له‌ به‌رامبه‌ردا دوێنێ عه‌بدوڵڵا گوڵ سه‌ركۆماری توركیا رایگه‌یاند نه‌وتی هه‌رێمی كوردستان به‌پێی ده‌ستور ده‌فرۆشرێ . پێشتریش وه‌زاره‌تى نه‌وتى عێراق رایگه‌یاند كه‌ سكاڵاى له‌ دژى وه‌زاره‌تى سامانه‌ سرووشتیه‌كان تۆمار كردووه‌ به‌هۆى ئه‌وه‌ى بێ گه‌ڕانه‌وه‌ بۆ به‌غدا نه‌وتى هه‌نارده‌ كردووه‌ .