عەممار حەكیم، سەرۆكی ئەنجوومەنی باڵای ئیسلامیی عێراق، كە بە رێگەی هاوپەیمانی مواتن بەشداری لە هەڵبژاردنی پەرلەمانی داهاتووی عێراق دەكات رایگەیاند "ئەمڕۆ، ئێستاو داهاتووی عێراق دیاریدەكات و هەموو هاووڵاتییەكی عێراق دەتوانێ بڕیاری خۆی بدات".

عەممار حەكیم لە كاتی دەنگدانیدا لە بنكەیەكی دەنگدان لە هۆتێڵی رەشید لە بەغدا گوتی: "رێژەی بەرزی بەشداریكردنی دەنگدەرانی دەرەوەو دەنگدەرانی تایبەت رەنگدانەوەی جۆشی دەنگدەرانە بۆ بەشداریكردن لە پرۆسەی هەڵبژاردن بەرێژەیەكی بەرز".

عەممار حەكیم گوتیشی "ئەمڕۆ هەموو هاووڵاتییەكی عێراق دەتوانێ دەنگ بدات و بڕیاری خۆی بدات".

ئەمڕۆ پرۆسەی دەنگدانی گشتی بۆ هەڵبژاردنی خولی سێیەمی پەرلەمانی عێراق لە هەموو ناوچەكانی عێراق و هەرێمی كوردستان بەڕێوەدەچێ و بڕیارە پرۆسەكە تا كاژێر 6ی ئێوارەی ئەمڕۆ بەردەوام بێ.

لەم هەڵبژاردنەدا زیاتر لە 9 هەزار كاندیدی 107 هاوپەیمانی و لیست و قەوارە ركابەری دەكەن بۆ بەدەستهێنانی 328 كورسی پەرلەمانی داهاتوو.








رووداو