عەدنان موفتی: مالیكی بە شێوەیەكی تاكڕۆیانە حوكم بكات، ناتوانێت چاكسازی بكات
*قەیرانەكانی عێراق بە لابردنی مالیكی چارەسەر دەكرێت؟
عەدنان موفتی: ئەو كێشەیەی ئێستا هەیە بەشێكە لە عێراقی تازە، كە عێراقی دیموكراتە، عێراق دەستووری هەیە ئەو دەستوورە نیشانی داوە ئەگەر هاتوو كێشەی سیاسی هەبوو بە ڕێگایەكی دیموكراسی ڕووبەڕووی ببینەوە. ئێستا چەندین لایەن هەن ناڕازین لە ئەدای سەرۆكوەزیرانی عێراق، نەگەیشتوینەتە دەرئەنجامێك و دیالۆگێكی ئەوتۆیش نییە. متمانەیش كەم بووەتەوە. گەیشتووینەتە ئەوەی كە داوای لێپرسینەوە لە سەرۆكوەزیران بكرێت و دانیشتنێكی پەرلەمان بكرێت بۆ لێپرسینەوە. ئەمەیش شێوازێكی دیموكراسییە.
ئەگەر سەری گرت باشە ئەگەر سەریشی نەگرت، لە ئەنجامدا چیی ببێت و نەبێت ئەوا كارێكی دیموكراسییە بۆ هەڵسوكەوتكردن لەگەڵ دەسەڵات و ئاڵوگۆڕی دەسەڵاتە، بۆ ڕەخنەگرتن و چارەسەركردنی هەڵەیە، نەك تەنها سەرۆكوەزیران دەبێت هەموو لایەنەكان ڕەچاوی بكەن و بیزانن، ئەبێت هەموومان پابەند بین بە یاسا و بە دەستوور.
*پێت وایە مالیكی دەتوانێت چاكسازی ئەنجام بدات؟
عەدنان موفتی: مالیكی بە تەنیا ناتوانێت چاكسازی بكات، ئەگەر هەموو لایەنەكان لەگەڵی ڕێككەون، بەرنامەیەك هەبێت مالیكی پابەند بێت بە دەستوور و ڕێككەوتنامەكانی هەولێر و ڕێككەوتنی دووقۆڵی و سێقۆڵیەكان و ڕەچاوی پێكهاتەكانی عێراق بكات، ئەتوانێت چاكسازی بكات؛ بەڵام ئەگەر بە شێوەیەكی تاكڕەوانە حوكم بكات ناتوانێت.
*یەكێتی و پارتی لەبارەی مالیكییەوە ڕایان جیاواز بوو؟
عەدنان موفتی: دوو كەسی ئاسایییش ڕای جیاوازیان هەیە، ئەمە شتێكی ئاساییە؛ بەڵام ئێمە هاوپەیمانین و یەك هەڵوێستمان هەیە، هیچ كاریگەری لەسەر ڕێككەوتنامەی ستراتیژی نییە، بەڵام قۆناغەكە جیاوازە ئێستا ئێمە لە ساڵی 2012ین، ڕێككەوتننامەی ستراتیژی لە ساڵی 2005واژۆ كراوە، زۆرشت هەیە كۆمان دەكاتەوە، ئێمە ئێستایش یەكهەڵوێستین.
*ساڵی داهاتوو ڕێككەوتننامەی ستراتیژی كۆتایی دێت، ئەم ڕێككەوتننامەیە درێژ دەكرێتەوە؟
عەدنان موفتی: ڕێككەوتننامەی ستراتیژی مانای ئەوە نییە یەك حزبین، ئەم ڕێككەوتننامەیە لە قۆناغێكدا ئیجابی دەكرد، یەك لیست بین؛ ئێستایش بۆ بەغدا ئێمە دەبێت یەك لیست بین، بەڵام بۆ كوردستان بارودۆخەكە ئاساییە بۆچوونێك هەیە دەڵێت هەریەكە و لیستی خۆی بێت مانای ئەوە نییە لە یەكتر جیا دەبینەوە، ئەو ڕێككەوتنە هەر دەمێنێت.
* تەندروستیی مام جەلال ئێستا چۆنە؟
عەدنان موفتی: تەندروستیی مام جەلال ئێستا زۆر باشە؛ تەنها كێشەی قاچەكانی هەیە، جاری پێشووتر كە سەردانی ئەڵمانیای كرد گوتیان دەبێت نەشەرگەری بۆ بكرێت، نەیكرد، ئەم جارە سەردانەكەی بۆ ئەڵمانیا بۆ ئەنجامدانی ئەو نەشتەرگەرییەیە، بۆ ئەوەی باشتر بێت، هەموومان هیوادارین بە تەندروستی یەكی باشەوە بگەڕێتەوە.
*ئێستا گفتوگۆ هەیە لەبارەی بودجەوە، تۆ پێشتر سەرۆكی پەرلەمان بووی، تێڕوانینت لەبارەی گفتوگۆی بودجەوە چییە؟
عەدنان موفتی: ساڵ بە ساڵ گفتوگۆ لەبارەی بودجەوە باشتر دەبێت، بودجەی ئەم ساڵ زۆر باشترە لە بودجەی پارساڵ، ساڵ بە ساڵ بودجەكە باشتر ئامادە دەكرێت و گفتوگۆی لەبارەوە دەكرێت؛ شەفافیەتی زیاتری پێوە دیارە، ئەمە مانای ئەوە نییە كەموكورتی نییە."
