دواى ئه‌وه‌ى به‌هۆى ناكۆكى نێوان هه‌ردو لیستى ده‌وڵه‌تى یاسا و لیستى عێراقیه‌، تائێستا سه‌رۆكى ئه‌نجومه‌نى نیشتیمانى سیاسه‌ته‌ ستراتیژیه‌كانى عێراق دانه‌نراوه‌، به‌مه‌به‌ستى چاره‌سه‌ر كردنى لیستى هاوپه‌یمانى كوردستان پێشنیارێك ده‌داته‌ لایه‌نه‌ سیاسیه‌كانى عێراق.

ئه‌مرِۆ یه‌ك شه‌ممه‌، \" شه‌ریف سوله‌یمان\"" ئه‌ندامی لیستى هاوپه‌یمانى كوردستان له‌ ئه‌نجومه‌نى نوێنه‌رانى عێراق رِایگه‌یاند: پێشنیارێكمان خستۆته‌ به‌رده‌م لایه‌نه‌كان بۆ یه‌كلایی كردنه‌وه‌ى پۆستى ئه‌نجومه‌نى نیشتیمانى سیاسه‌ته‌ ستراتیژیه‌كانى عێراق و له‌ ئێساشدا لایه‌نه‌كان سه‌رقاڵى تاوتوێ كردنى ئه‌و پێشنیاره‌ن.

شه‌ریف سوله‌یمان، وتیشی: به‌پێی پێشنیاره‌كه‌ له‌ ئه‌نجومه‌نى وه‌زیران ده‌نگ له‌سه‌ر سه‌رۆكى ئه‌نجومه‌نى نیشتیمانى سیاسه‌ته‌ ستراتیژیه‌كان ده‌درێت و دواتر رِه‌وانه‌ى په‌رله‌مانى عێراق ده‌كرێت بۆ ده‌نگدان له‌سه‌ری و په‌سه‌ند كردنى.

شایانى باسه‌، كه‌به‌پێى رِێككه‌وتنامه‌ى هه‌ولێرى نێوان لایه‌نه‌ سیاسیه‌كانى عێراق ده‌بێت پۆستى سه‌رۆكى ئه‌نجومه‌نى نیشتیمانى سیاسه‌ته‌ ستراتیژیه‌كان بدرێته‌ ئه‌یاد عه‌لاوى سه‌رۆكى لیستى عێراقیه‌.


سه‌رچاوه‌/ سۆمه‌ریه‌ نیوز"