حكومەتی هەرێمی كوردستان وێڕای ئەوەی ماوەی ساڵێكە لەلایەن بەغداوە بودجە و مووچەی لێبڕاوە، هاوكات رووبەڕووی شەڕێكی نەخوازراوی گەورە و شاڵاوێكی ئاوارەكان بۆتەوە، هەموو ئەمانەش قەیرانی گەورەیان بۆ حكومەتی هەرێمی كوردستان دروستكردووە. بۆ قسەكردنی لەسەر ئەو پرسانە و ئەركەكانی حكومەتی هەرێمی كوردستان و چۆنیەتی بەڕێوەبردنی ئەم قەیرانە نەخوازراوانە، گوڵان ئەم دیمانە تایبەتەی لەگەڵ بەڕێز قوباد تاڵەبانی جێگری سەرۆك وەزیرانی كوردستان ئەنجامدا. هەر لەم دیمانەیەدا جێگری سەرۆك وەزیران مزگێنی ئەوە بە خەڵكی كوردستان دەدات كە قەیرانی دارایی هەرێمی كوردستان بەرەو كۆتایی دەچێت، هەتا ئەگەر لەگەڵ بەغداش نەگەنە رێككەوتن، هێما بۆ ئەوەش دەكات كە لە بەرەكانی شەڕدا (لە كۆبانێ تا دەگاتە سەعدیە و جەلەولا) بە تەواوەتی ئاڕاستەی شەڕەكە لە بەرژەوەندی كوردستان گۆڕاوە، سەبارەت بە كێشەی ئاوارەكانی كوردستان بەگشتی و دهۆك بەتایبەتی جەخت لەسەر ئەوە دەكاتەوە كە كەمپیان بۆ دروست دەكەن و قوتابخانەكان نۆژەن دەكرێنەوە بۆ ئەوەی پرۆسەی خوێندن لەو قوتابخانانەش دەست پێبكاتەوە، ئەمەش دەقی دیمانەكەی جیگری سەرۆك وەزیرانی كوردستانە.

*ئەگەر لەوە دەست پێبكەم كە لە بارودۆخێكدا بوویت بە جێگری سەرۆك وەزیرانی هەرێمی كوردستان، كە بەختت نەبوو، لەبەر ئەوەی بارودۆخێكی وا ئاڵۆز و هەستیار هاتە پێشەوە كە زۆر ئەركتانی قورس كرد، وەك نەبوونی بودجە و مووچە و شەڕی داعش، ئایا چۆن لەگەڵ سەرۆك وەزیران ئەم تەنگژانەتان بەڕێوە بردووە؟
- من ناڵێم بێ بەخت بووم، بەپێچەوانەوە گەورەترین شەرەفە مرۆڤ بتوانێت خزمەتی گەل و خاكی خۆی بكات، بەتایبەتی لەكاتی هەستیار و ناسكدا، راستە بارودۆخەكە نائاسایی و پڕ قەیرانە، بەڵام مرۆڤ دەبێت زۆر بەختەوەر بێت كە دەرفەتێكی بدرێتێ بۆ ئەوەی خزمەتی گەلی خۆی بكات، راستە لەگەڵ دەستبەكاربوونی كابینەی هەشتەم چەندین قەیران رووبەڕووی كوردستان بۆتەوە، بەڵام ئەمەش تەحەدایەكە بۆ ئێمە بۆ ئەوەی بزانین چۆن كوردستان لەم قەیرانانە رزگار دەكەین ئەم بارودۆخە تێدەپەڕێنین، بۆ ئەمەش تەواوی وەزیرەكان و سەرۆكایەتی ئەنجوومەنی وەزیران، هەموو پێكەوە ئەو ئامادەباشییان تێدایە بۆ ئەوەی سەربەرزانە كوردستان لەم قەیرانانە رزگار بكەین.


* حوكمڕانی واتە پێشكەشكردنی خزمەتگوزاری، خزمەتگوزاریش بە پارە دەكرێت، ئێوە تووشی قەیرانی دارایی و لە هەمانكاتدا شەڕێكی سەخت و ئاوارەیەكی یەكجار زۆر بوون، ئایا چۆن توانیوتانە بێ پارە حوكمڕانی بكەن؟
- ئەركی سەرەكیی حكومەت پاراستنی هاووڵاتیانە و دوای ئەوە گەیاندنی خزمەتگوزارییە بۆیان، بەڵام حكومەتی هەرێمی كوردستان رووبەڕووی دوو شۆكی زۆر گەورە بۆتەوە، ئەو شۆكانەش هێندە گەورەن لەوانەیە زۆر لە حكومەتەكانی ئەم دنیایە نەتوانن بەرگەی بگرن، دیارە شۆكی یەكەم بڕینی بڕە بودجەی كوردستان و مووچەی فەرمانبەرانی كوردستان بووە، راستە وڵاتان رووبەڕووی قەیران دەبنەوە، بەڵام هیچ حكومەتێكم نەبینیوە لە شەو و رۆژێكدا هەرچی داهاتی هەیە، بیبڕێت، كوردستان رووبەڕووی ئەم شۆكە بۆتەوە، شۆكی دووەم ئەو جەنگە نەخوازراوەیە كە كوردستان رووبەڕووی بۆتەوە، ئەم جەنگە جگە لەوەی ژمارەیەكی یەكجار زۆر پێشمەرگە قوربانی داوە، لەهەمانكاتدا ئەم شەڕە خەرجییەكی یەكجار زۆری دەوێت، ئەمەش باری حكومەتی گرانتر كردووە، ئەوجا لە شۆكی دووەمەوە شۆكێكی دیكە لەدایك بووە، ئەویش شۆكی ئاوارەكانە، ئاكامی ئەو جەنگەیە كە كوردستان رووبەڕووی بۆتەوە، حكومەتی هەرێمی كوردستان توانیوویەتی شۆكی یەكەم ئیدارە بكات، هەروەها پشتیوان بەخواو هێزی پێشمەرگەش، توانیوومانە ئیدارەی شەڕەكەش بدەین، ئەوەی جێگەی خۆشحاڵیە رۆژ لەدوای رۆژ چ لەرووی حوكمڕانی و چ لەرووی بەڕێوەبردنی جەنگەوە بەرەو سەركەوتن و دەربازبوون دەچین لەو قەیرانانە.


* سەرۆكایەتی حكومەت و بەشەخسی بەڕێزت لەگەڵ كێشەی ئاوارەكان زۆر سەرقاڵ بوون، بۆ ئەمەش سەرۆكایەتی ئەنجوومەنی وەزیران، كۆبوونەوەی ئەنجوومەنی وەزیرانی بردە دهۆك، تاچەند ئەم ئاوارانە هێندەی دیكە باری حوكمڕانی كوردستانی قورسكردووە؟
- بەڕاستی كۆی حكومەت بەرپرسیارانە مامەڵەی لەگەڵ ئەم پرسە كرد، سەردانیشمان بۆ دهۆك بەشێك بووە لە بڕیاری حكومەت بەوەی پێویستە بچینە دهۆك بۆ ئەوەی بزانین وەك ئەنجوومەنی وەزیران چۆن و چیمان لەدەست دێت بۆ ئاوارەكانی بكەین، تۆ سەرەتا باسی بەدبەختیت كرد، بەڵام من پێموایە لەم پرۆسەیەدا لە هەموومان بەدبەختر پارێزگاری دهۆك بوو، كە لەیەكەم رۆژی دەستبەكاربوونییەوە زیاتر لە 800 هەزار ئاوارە روویان لە پارێزگای دهۆك كرد، ئەمەش وایكرد، بكەونە ژێر بارێكی زۆر زۆر قورس، بۆیە حكومەت بە پێویستی زانی سەردانی دهۆك بكەین، ئەمەش بارگرانی دروستكردووە، ئەو بارگرانییەی دووجۆرە، جۆرێكیان ئەوەیە دەتوانیت هەڵسەنگاندنی بۆ بكەیت، وەك ئەوەی حكومەتی هەرێم چەند پارەی تەرخانكردووە بۆ ئەو ئاوارانە، بۆ دروستكردنی كەمپەكان، بۆ كڕینی دەرمان.


* دەتوانی بڕی ئەو پارانە ئاماژە پێبدەیت كە خەرجكراوە؟
- ئاماری ورد لای پارێزگای دهۆكە، بەڵام تەنها وەك ئەنجوومەنی وەزیران، كە لە ئەنجوومەنی نەوت و گازەوە تا ئێستا (36500000) سی و شەش ملیۆن و پێنچ سەد هەزار دۆلار بووە، لەسەرەتای ئەم قەیرانە، بەدەستخۆشیەوە وەزارەتی دارایی بەپەلە ملیارێك دیناری كۆكردەوەو تەرخانی كرد بۆ پارێزگای دهۆك، بەڵام هەندێك ئەركی دیكە هەیە كە جارێ ناتوانی قەوارەی دارایی بۆ دیاری بكەیت، بۆ نموونە چەندین پۆلیس بەردەوام ئاوارە و كەمپەكانیان پاراستووە، چەندین كارمەندی تەندروستی خەریكی چارەسەر بوونە، قوتابخانەكانمان كەهەموویان بوونە شوێنی ئاوارەكان، گەیاندنی خزمەتگوزاری ئاو و ئاوەڕۆ و كارەبا، بۆیە لە پرۆسەی ئیدارەدانی ئاوارەكان، خەرجی دیار و خەرجی نادیار هەیە. وەزارەتی پلاندانان لەگەڵ WBخەریكە داتا كۆدەكەنەوە لەسەر خەرجییە نادیارەكان.


* ئایا تاچەند كۆمەڵگەی نێودەوڵەتی، یان حكومەتی عێراق هاوكاری كردوون؟
- كۆمەڵگەی نێودەوڵەتی هاوكاری كردووین و جێگەی سوپاس و دەستخۆشییە، ئەم هاوكارییانە زۆر پێویست بوون و گرنگیشە بەردەوام بێت، بەڵام دابەشكردن و بە هەماهەنگی لەگەڵ حكومەت، یان لایەنە پەیوەندیدارەكانی حكومەت مامەڵەی لەگەڵ نەكراوە، راستە نوێنەری نەتەوەیەكگرتووكان و نوێنەری ئاژانسەكانی نەتەوە یەكگرتووەكان لە كوردستانن و لەگەڵ لایەنی پەیوەندیدار پێكەوە كار دەكەن، بەڵام ئومێد و مەزندەی ئێمە بۆ هاوكارییەكان زۆر زیاتر بوو، مەزندەمان دەكرد ئاستی هاوكارییەكان زیاتر بوایە و بە هەماهەنگیەكی زیاتر لەگەڵ حكومەتی هەرێمی كوردستان مامەڵەی لەگەڵ بكرایە، لایەنێكی دیكە دەبوو حكومەتی عێراق بەرپرسیارانە مامەڵەی لەگەڵ ئەم قەیرانی ئاوارانە بكردایە و هەماهەنگی لەگەڵ حكومەتی هەرێمی كوردستان بكات، هەرچەندە بەڕێز ساڵح موتڵەگ چەندین جار سەردانی كوردستانی كردووە و دەورێكی كاریگەری بینیوە، بەڵام بەداخەوە حكومەتی بەغدا بەگشتی وەك حكومەتێكی بیانی مامەڵەی لەگەڵ پرسی ئاوارەكانی كوردستان كردووە، هەتا ئێستا وەك وڵاتێكی جیاواز مامەڵە لەگەڵ ئەم پرسە دەكات، حكومەتی بەغدا وەك وڵاتێكی بیانی ناو بەناو یارمەتییەك دەنێرێت، ئەوان بەوجۆرە سەیری پرسی ئاوارەكانی كوردستان ناكەن، وەك ئەوەی كارەساتێك بێت و لەوڵاتی خۆیان روویدابێت، ئەمەش بەشێكە لە وتووێژەكانمان لەگەڵ بەغدا.


* دیارە لە ئەنجوومەنی وەزیران لیژنەیەك هەیە بۆ بەدواداچوونی پرسی ژنان و كچانی ئێزیدی، لەمبارەوە چیتان كردووە؟
- لیژنەكە تایبەت نییە تەنها بە پرسی كچان و ژنانی ئێزیدی، ئەم لیژنەیە لەلایەن د.نوری سەرۆكی فەرمانگەی هەماهەنگی بەدواداچوونە لە ئەنجوومەنی وەزیران، سەرپەرشتی دەكرێت، ئەو رۆڵێكی زۆر گەورەی بۆ هاوكاری ئاوارەكان گێڕاوە، هەروەها رۆڵێكی گرنگی گێڕاوە بۆ دروستكردنی هەماهەنگی لەگەڵ ئەو كەسانەی هێشتا لە چیای شنگال ماون، هەروەها هاوكاری پارێزگاری دهۆكیشە بۆ هەماهەنگی لەنێوان فەرمانگاكانی پارێزگای دهۆك و كەمپەكانی ئاوارەكان، هەروەها بۆ هاوكاریكردنی ئەو خوشكە ئێزیدییانەی لە دەستی داعش رزگاریان بووە، بۆیە كارەكەی د.نوری هەمەجۆرە، هەموو كاروبارەكانی پەیوەندیدار بە دۆسیەكانی شنگال دەگرێتەوە.


* لەپرسی ئاوارەكاندا ئاماژەتان بەوەكرد حكومەتی عێراق وەك وڵاتێكی بیانی مامەڵە لەگەڵ كوردستان دەكات، دیارە پێشتریش لە مانگی یەكی ئەمساڵەوە بە بیانووی كێشە لەسەر سیاسەتی نەوتی هەرێم بودجە و مووچەی كوردستانیان بڕیوە، بە تێڕوانینی ئێوە بنەمای كێشەكانی نێوان بەغدا و هەولێر چین؟
- بە تێڕوانینی من بنەمای كێشەكانی نێوان هەردوولا دەگەڕێتەوە بۆ فەرهەنگ، ئەو دوو فەرهەنگە زۆر جیاوازن، لە بەغدا فەرهەنگێك هەیە بەستراوەتەوە بەوەی چۆن دەسەڵات كۆدەكەیتەوە لە دەستی خۆتدا، ئەمەش لەگەڵ ئەو فەرهەنگەی هەرێمی كوردستان ناگونجێت، لەبەر ئەوەی ئێمە دەمانەوێت دەستوور جێبەجێ بكرێت و دەسەڵات دابەش بكرێت بەكردەیی فیدڕاڵیزم لەم وڵاتە جێبەجێ بكرێت. ئەوجا كێشەكان نەوتە، پێشمەرگەیە، جێبەجێكردنی ماددەی 140 و كێشەی ترە، ئەمانە هەمووی دەگەڕێنەوە بۆ جیاوازیی نێوان ئەو دوو فەرهەنگە، لەبەر ئەوەی دوو فیكر و دووفەرهەنگی زۆر جیاواز هەیە بۆ چۆنیەتی مامەڵەكردن لەگەڵ ئەم پرسانە، من دەڵێم دوو فەرهەنگ، بەڵام جیاوازی فەرهەنگی دیكەش هەیە لەبەر ئەوەی لایەنی دیكەش كێشەیان لەگەڵ بەغدا هەیە كە عەرەبی سوننەن، هەروەها لە هەرێمی كوردستانیش هەموویان لەگەڵ بۆچوونی بەغدا یەك نین، بەڵام پرسیارەكەی ئێوە زیاتر تایبەت بە كێشەكانی نێوان هەولێر و بەغدا بوو، بۆیە بنەمای كێشەكان نێوان بەغدا و هەولێر دەگەڕێتەوە بۆ ئەوەی بەغدا دەیەوێت كۆنتڕۆڵی هەموو پرسەكان لەدەستی خۆیدا بێت، دیارە كوردستان ئەزموونی ئەوەی هەیە كاتێك بەغدا هەموو دەسەڵاتەكان لەبەر دەستی بەغدا بێت دووچاری چی دەبێتەوە، بۆیە ئەمجارەیان سوورە لەسەر ئەوەی داكۆكی لە مافە دەستوورییەكانی خۆی بكات.


* تاچەند لاچوونی مالیكی تێگەیشتنێكی نوێ بۆ سیاسەتی نەوتی هەرێمی كوردستان دروست كردووە ؟
- كێشەكانی هەرێم و بەغدا نەبەستراونەتەوە بە شەخسێكەوە كە ناوی مالیكییە، چونكە پێش مالیكیش لەسەردەمی جەعفەری و عەلاویشدا بەجۆرێك لەجۆرەكان ئەم كێشانە هەر هەبوون، بۆیە غەدر لەخۆمان دەكەین ئەم كێشانە ببەستینەوە بە تەنها شەخسێكەوە، باشە با پرسیار لەخۆمان بكەین بۆ ئێمە هێشتوومانە شەخسێك ئەوەندە بەهێز بێت هەموو دەسەڵاتەكان لەدەستی خۆی كۆبكاتەوە؟ بۆیە گرفتی سەرەكی لە عێراقدا ئەوە بووە لەم وڵاتە سیستم نەبووە و ئەمانەش ئەو بێ سیستمییەیان ئیستغلال كردووە و توانیویانە رۆژ لەدوای رۆژ زیاتر دەسەڵاتەكان بۆ خۆیان كۆنتڕۆڵ بكەن، بۆیە ئەمە بۆتە هۆكاری بەشێكی لەو كێشانەی ئەمڕۆ تووشی بووین، بەڵام ئەمڕۆ حكومەتێكی نوێیە، چەند كەسێكی نوێ هاتوون، لەم حكومەتە تازەیە كورد پێگەیەكی بەهێزی هەیە، سەرۆك كۆمار و جێگری سەرۆك وەزیران و وەزیری دارایی كوردن، گۆڕانكاریەكی دیكەی زۆر باش لە حكومەتی تازەی عێراق كە كراوە و زۆر باس نەكراوە، مەسەلەی دامەزراوە سەربازی و ئەمنییەكانە، لە كابینەی پێشتر نوری مالیكی خۆی سەرۆك وەزیران بوو، وەزیری ناوخۆ و بەرگری و بەرپرسی دەزگای هەواڵگری بوو، بەڵام لەم كابینەیە وەزیری بەرگری و ناوخۆ هەیە، وردە وردە خەریكە دەسەڵاتەكانی خۆیان وەردەگرنەوە، بۆیە ئێمە ئومێدمان بەو جۆرەیە بە حوكمی ئەو كەسایەتییانەی لە ناو ئەم كابینەن، ئەم حكومەتە لە حكومەتەكانی پێشتر جیاواز دەبێت، من لەو بڕوایەدام ئەگەر ئێمە نەتوانین لەگەڵ ئەم حكومەتە رێك بكەوین، ناتوانین لەگەڵ هیچ حكومەتێكی دیكەی عێراق رێك بكەوین.


* هاتنی عادل عەبدولمەهدی وەزیری نەوتی عێراق، خەریكە زەمینەی قسەكردن لە نێوان هەولێر و بەغدا دروست دەكاتەوە، خۆت بەشداری كۆبوونەوەكان بوویت، ئایا چۆن سەیری ئەم سەردانە دەكەیت؟
- ئێمە بەهەڵبژاردنی بەڕێز د.عادل عەبدولمەهدی بۆ وەزیری نەوتی عێراق خۆشحاڵ بووین، لەبەر ئەوەی ئەم كەسایەتییە بەڕێزە و ناسراوە و بەشداریش بووە لە شۆڕشی كوردستاندا، لە ناوەوەی عێراق دۆستایەتییەكی نزیكی لەگەڵ بەشێكی زۆری بەرپرسەكانی كوردستان هەیە، بەڵام دەبێت ئەوەش بڵێین د.عادل عەبدولمەهدی ئەم كەسایەتییە بەڕێزە وەزیری وەزارەتێكە كە چەندین ساڵە ئەم وەزارەتە بەلاڕێدا براوە، بۆیە ئێمە لەكاتێكدا خۆشحاڵین بەم كەسایەتییە كە وەزیری نەوتی عێراقە، بەڵام لە هەمانكاتدا دەبێت دیدمان واقیعی بێت، بەوەی رەنگە بە تەنها كەسێك نەتوانرێت بە زوویی ئەقڵییەتێك، یان فەرهەنگێك بگۆڕێت، هەرچۆنێك بێت د.عادل عەبدولمەهدی سەردانی كوردستانی كرد و لەگەڵ بەڕێز سەرۆك وەزیران و بەندە دانیشت، هەروەها سەردانی جەنابی سەرۆكی هەرێمی كوردستانی كرد، پێموایە سەرەتایەكی باش بوو.


* ئێستا باس لەسەردانی شاندێكی باڵای حكومەتی هەرێمی كوردستان دەكرێت بۆ بەغدا، ئایا چۆن سەیری ئەو سەردانە دەكەیت و پێتوایە ئەمجارە ئاكامی چۆن دەبێت؟ ئەگەر نەگەیشتنە رێككەوتن مامەڵەتان لەداهاتوودا لەگەڵ بەغدا چۆن دەبێت؟
- ئەوەی ئێستا هەم دەرفەتە بۆ بەغدا، هەمیش دەرفەتە بۆ هەرێمی كوردستان، كوردستان تووشی قەیرانێكی گەورە بووە و بەشی زۆری پەیوەندی بە بەغداوە هەیە و بەشێكیشی پەیوەندی بە ئیدارەی خۆمانەوە هەبووە. دیارە د.عادل عەبدولمەهدی هاتووە لەسەر چەند خاڵێك رێككەوتین، ئەوان تا رادەیەك پابەندبوون بەو بەشەی پەیوەندی بە خۆیانەوە هەبووە، ئێمەش پابەندبووین بەو بەشەی پەیوەندی بەخۆمانەوە هەبووە، ئەمەش جۆرە متمانەیەكی دروستكردووە، بەڵام ئەمە سەرەتایە و ئێستا پێویستە هەردوولا هەنگاوەكانمان بەرەو ئاستێكی دیكە بەرین، قۆناخی داهاتوو ئەوەیە شاندێك لە هەرێمی كوردستانەوە سەردانی بەغدا بكات، بۆ ئەوەی گفتوگۆی كێشەكان بكەین، راستە لەسەردانەكەی د.عادل عەبدولمەهەدی لەسەر چەند خاڵێك رێككەوتین، بەڵام باسی چەندین خاڵی دیكەشمان كرد، لەوانە نیگەرانی ئێمە چیەو هی بەغدا چییە، ئەگەرەكان چین، لە ئێستا بەرهەمهێنانی نەوتی عێراق دابەزیووە، لە بەرامبەردا بەرهەمهێنانی نەوتی كوردستان روو لە زیادبوونە، عێراق لە باكور و ناوەڕاست ژێرخانی نەماوە، لە بەرامبەردا كوردستان ژێرخانێكی جوان و تازەی هەیە، نرخی نەوت لە بازاڕەكانی جیهان دابەزیوە، ئەمەش كاریگەری خراپی لەسەر كوردستان و عێراق هەبووە، بۆیە زەمینەكە وا هاتۆتە پێشەوە كە رێكبكەوین، ئەمجارە لە جارەكانی دیكە جیاوازە، جارانی پێشتر هاوسەنگییەك لەنێوان بارودۆخی ئێمە و بەغدا نەبووە، پێشتر هەموو كات بەغدا لەسەرچاوەی هێزەوە قسەی كردووە و بەبەراورد بە بەغدا ئێمە لاواز بووین، پێشتر ئەوان ژێرخانێكی زۆرباشیان هەبوو ئێمە نەمانبوو، ئەوان نەوتیان هەبوو ئێمە نەمانبوو، بەڵام ئێستا هاوسەنگیەك هەیە و هەردوولاشمان پێویستمان بەیەكترییە، بۆیە من گەشبینم لەوەی كە بتوانین بگەینە چارەسەر، چارەسەرێك بتوانین مافە دەستوورییەكانی خۆمان بپارێزین.


* مەسەلەیەكی دیكەی گرنگ پرسی پێشمەرگەیە كە ئێستا ئەمریكا و هاوپەیمانان راستەوخۆ مامەڵەی لەگەڵ دەكەن، بەڵام پرسی پێشمەرگە خاڵی ناكۆكییە لە نێوان هەولێر و بەغدا، تا چ ئاستێك زەمینەی چارەسەركردنی ئەم پرسە لەگەڵ بەغدا هەیە كە ئێستا لە شەڕێكی زۆر قورسداین؟
- پرسی پێشمەرگە چەند لایەنێكە، لایەنێكیان پەیوەندی بە بودجەی پێشمەرگەوە هەیە، لە ئێستادا پێشمەرگە سەلماندوویەتی لە بری هەموو جیهانی ئازاد شەڕی تیرۆریستان دەكات، گەورەترین قوربانی داوە لە پێناوی دژایەتیكردنی داعش و پاراستنی كوردستان و شەڕكردن بۆ هەموو عێراق، بۆیە دەبێت لێرەوە بەدوا عێراق بە ویژدانەوە مامەڵە لەگەڵ پرسی پێشمەرگە بكات، پێویستە چیتر عێراق پێشمەرگە وەك مەترسی سەیر نەكات، بەڵكو وەك هێزێكی كاریگەر لە وڵاتدا سەیری بكات و شانازی بكات و پشتگیری بكات، ئەم مەسەلەیەش بەشێكی گرنگ دەبێت لە پێوەندییەكانمان و گفتوگۆكانمان لەگەڵ بەغدا.


* دوای سەردانەكەی وەزیری نەوتی عێراق، بەڕێز داود ئۆغڵۆ سەردانی بەغدا و هەولێری كرد و خۆتانیش لەكۆبوونەوەكان بەشدار بوون، پێشان مەترسی ئەوە هەبوو پەیوەندی ئەنكەرە و بەغدا لەسەر حسابی هەولێر بێت، بەڵام ئەمجارە باسی شتی دیكە دەكرێت، خوێندنەوەتان بۆ ئەوە چییە؟
- ئێمە بەشتێكی باشی دەزانین پەیوەندی نێوان توركیا و عێراق باش بێت و بەو شێوەیە سەیری ناكەین زیانی بۆ كوردستان هەبێت، بەپێچەوانەوە لەوانەیە سەرئێشەیەكمان لەكۆڵ بكاتەوە، ئەوەی لەسەردانەكەی بەڕێز ئەحمەد داود ئۆغڵۆ بەروونی دەركەوت، ئەوەبوو هاتبوو پێمان بڵێت عێراق و توركیا دەیانەوێت لاپەڕەیەكی نوێ هەڵبدەنەوە، بەڵام نەك لەسەر حسابی پەیوەندییەكانی توركیا لەگەڵ هەرێمی كوردستان، بەشێكی زۆر سەردانەكەی داود ئۆغڵۆ بۆ ئەوەبوو دڵنیامان بكاتەوە، بەوەی پێویست ناكات ئێمە هیچ نیگەرانی و دوودڵیەكمان لە نزیكبوونەوەی توركیا و عێراق هەبێت.


* لەسەردانی جۆ بایدن بۆ توركیا، لەوێ خۆشحاڵی خۆی بۆ نزیكبوونەوەی بەغداو هەولێر پیشاندا، لەم پرسەدا رۆڵی ئەمریكا چۆن دەخوێنیتەوە؟
- لەپرۆسەی پێكهێنانی حكومەتی تازەی عێراقدا، ئەمریكا و بەریتانیا و نوێنەری نەتەوەیەكگرتووەكان لەعێراق، رۆڵی كاریگەریان بینی، گوشارێكی زۆر خرایە سەر هەموولایەك، بۆ ئەوەی حكومەتێكی هەمەلایەن پێك بێت و كورد بەشدار بێت لەو حكومەتەدا، كورد ئەزموونێكی تاڵی لەگەڵ بەغدا هەبوو بۆ لایەنە سیاسییەكانی كوردستان ئاسان نەبوو بڕیار بدەن بەشداری لە حكومەتی بەغدا بكەن، بەشێكی بڕیاری بەشداریكردنی كورد لە حكومەتی ئەمجارەی عێراقدا، لەبەر دڵی ئەو لایەنانە بوو، ئەوان داوایان لێ كردین شانسێكی دیكە بدەین بە عێراق، بۆیە ئێمەش وتمان با ئێمەش شانسێكی دیكە بە عێراق بدەین، ئەوانیش فشارێكی زۆریان خستۆتە سەر بەغدا بۆ ئەوەی ئەو رێككەوتنانەی كە ئێستا هەن بێنەدی، بۆیە شتێكی سروشتی بوو ئەمریكا بەم رێككەوتنە سەرەتاییەی نێوان بەغداو هەولێر خۆش حاڵ بێت.


* پێش ئەوەی ببیتە جێگری سەرۆك وەزیران، نوێنەری حكومەتی هەرێمی كوردستان بوویت لە ئەمریكا، هەروەها تێكەڵاوییەكی زۆرت لەگەڵ ناوەندەكانی توێژینەوە و رۆژنامەنووسان هەبوو، ئایا لەسەر ئەزموونی ئەم پاشخانە ئێستا سیاسەتی ئەمریكا بەرامبەر عێراق و كوردستان چۆن دەخوێنیتەوە؟
- پێموایە ئەو تێڕوانینەی پێشتر هەبوو لە ئەمریكا بەوەی دەبێت بەهەر نرخ و شێوازێك بێت یەكپارچەیی عێراق بپارێزرێت، ئێستا ئەوە كاڵبۆتەوە، پێموایە ئەو كەسانەی دیراسەتی عێراق دەكەن، چ لەناو ئیدارەی ئەمریكا و چ لە ناوەندەكانی فیكری و لێكۆڵینەوە، مەسەلەی فیدڕاڵیزم، یان جیاكردنەوەی دەسەڵاتەكان و هەتا دابەشكردنی عێراق، ئێستا بە كارەساتێك لە قەڵەمی نادەن، راستە سیاسەتی ئەمڕۆی ئەمریكا بۆ عێراق ئەوەیە حكومەتێكی فیدڕاڵی دیموكراتی یەكگرتوو هەبێت، بەڵام من بینیومە ئەو جۆرە بیركردنەوەیە كە دابەشكردنی عێراقە كارەسات نییە، لە ناوەندەكانی فیكری و لێكۆڵینەوە بەرەو پێشەوە چووە.


* دەڵێن سیاسەتی نەوتی كوردستان، سەرچاوەی كێشەكانی نێوان كورد و عەرەبی عێراقە، لەم روانگەیەوە ئایندە چۆن دەبینیت؟
- لەگەڵ ئەوە هاوڕا نیم، بەوەی سیاسەتی نەوتی هەرێمی كوردستان سەرچاوەی كێشەكان بێت، بەپێچەوانەوە رۆژ لەدوای رۆژ خەریكە بۆمان دەردەكەوێت، كە بڕینی بودجەی كوردستان هیچ پێوەندییەكی بە سیاسەتی نەوتی هەرێمی كوردستانەوە نییە، بەڵكو زیاتر بۆ تەنگژەی دارایی و خراپ بەكارهێنانی بودجەی عێراق دەگەڕێتەوە، بەتایبەتی ئێستا سەرچاوەی باشمان دەسكەتووە (بەپێكەنینەوە) لە وەزارەتی دارایی عێراقەوە، خەریكە بۆمان دەردەكەوێت چەندەها ملیار دۆلار لە بودجەی عێراق دیار نییە، بۆیە لەگەڵ ئەوەی زووە جارێ ئەوە بڵێم، بەڵام من پێموایە بەشێك لە هۆكارەكانی بڕینی بودجەی كوردستان كێشەیەكی زۆر گەورەیە و لەوانەیە سیاسەتی نەوتی كوردستانیان وەك بیانوویەك بۆ ئەو بڕینە بەكارهێنرابێت، ئێمە لەچوارچێوەی دەستووری عێراقدا سیاسەتی نەوتمان پیادەكردووە، لەچوارچێوەی دەستووری عێراقدا ئەو ژێرخانەمان بونیادناوە، كە لەماوەی 3-4 مانگی دیكە بەبێ ئەوەی یەك دینار لە بەغداوە بێت ئیدارەی حكومەتی هەرێمی كوردستان بكەین. ئەمە مانای ئەوه نییە ئێمە نامانەوێت لەگەڵ بەغدا رێك بكەوین، بەڵكو مانای ئەوەیە بژاردەیەكی دیكەشمان لەبەردەستە، عێراقیش باش دەزانێت ئەو بژاردەیەمان هەیە، بۆیە ئەگەر نەتوانن لە گەڵمان رێك بكەون، ئەوا كوردستان پەكی ناكەوێت و دوای چەند مانگێكی زۆر كەم، قۆناخە سەختەكە تێدەپەڕێنین.


* پێشتر ئاماژەت بەوە كرد ئەگەر ئیدارەی خۆمان بەمجۆرە بێت، هەتا ئەگەر بەغداش بودجە بگێڕێتەوە كێشەمان هەر دەبێت، دەتوانی ئەمە بۆ خوێنەران زیاتر روونبكەیتەوە؟
- كێشەكان كەم نین، ئێمە لەنێوان دوو بیرۆكەدا گیرمان خواردووە، ئایا ئێمە وڵاتێكی سەربەخۆین یان هەرێمێكین لەناو وڵاتێكدا؟ ئێمە هەندێك دامەزراوەمان هەیە دامەزراوەی دەوڵەتێكی سەربەخۆن، هەر بۆ نموونە هێزی پێشمەرگەی خۆمانمان هەیە، ئاژانسی هەواڵگری خۆمانمان هەیە، نوێنەرایەتی خۆمانمان لەوڵاتانی دەرەوە هەیە، سیاسەتی ئابووری و ئاوەدانكردنەوەی خۆمانمان هەیە، بەڵام لەلایەكی ترەوە شێوازی كاركردنی رۆژانەمان وەك هەرێمێكە، منحەیەكمان بۆ دێت و یەكسەر سەرفی دەكەین. نەمانتوانیوە بەروئیایەكی درێژخایەنانە مامەڵە بە بودجەكەی خۆمانەوە بكەین، كە دەڵێم نەمانتوانیوە لەبەر ئەوەی بەشێكی زۆری لەدەسەڵاتی خۆماندا نەبوو، بەغدا وەك هەرێمێك مامەڵەی نەكردوین بەڵكو وەك پارێزگایەك مامەڵەی لەگەڵ كردووین، ئەو بە ئێمەی وتووە ساڵانە دەبێ ئەوەندە هەزار فەرمانبەر دابمەزرێنن، بڕی بودجەكەتان ئەوەندەیە، ئەوەندەی دەبێت بۆ بەكاربەر بێت و ئەوەندەی بۆ وەبەرهێنانە، ئەمەش مانای ئەوەیە ئەو رێككەوتنەی لەنێوان هەرێم و بەغدا كراوە بناخەكەی غەڵەت بووە، پرسیار لێرە ئەوەیە بەغدا هەقی چییە ئێمە بودجەی خۆمان چۆن سەرف دەكەین؟ بەغدا بۆ هەقی هەبێت بە ئێمە بڵێت دەبێت بودجەكە وا سەرف بكەیت و وا سەرفی نەكەیت؟ ئەمە ئەركی پەرلەمانی خۆمانە...ئەمە كێشەیەكی ئیداری دروستكردووە و ئێمەش ساڵ لەدوای ساڵ پێڕەومان كردووە، ئەمە بێجگە لە مەسەلەی لە 17% كە راستیەكەی 17%یش نییە و 10%ـە، كە ئەمە كێشەیەكی ترە، بەڵام زۆریی فەرمانبەرانی حكومەتمان، خراپی دابەشكردنی ئەو فەرمانبەرانە بەسەر وەزارەتەكاندا، سیستمی دوو ئیدارەیی كە بەداخەوە تا ئەمڕۆ مۆركێكی هەر پێوە دیارە، بۆیە لەگەڵ بەڕێز سەرۆكی ئەنجوومەنی وەزیران بڕیارمان داوە لەم كابینەیەدا ئەو مۆركی دوو ئیدارەییە نەمێنێت و بیكەین بە یەك حكومەت. ئەمانە هەمووی كێشەن توانیومانە ساڵ بەساڵ باشتری بكەین، هەموو كابینەیەك هەنگاوێك هەڵگیراوە بۆ نەهێشتنی فەرهەنگی دوو ئیدارەیی، بەڵام دەبێت لەم كابینەیە ئەو فەرهەنگە لەناو بەرین.


* زۆر باس لە رێكخستنەوەی فەرمانبەران دەكەن، بەنیازن چی بكەن و چۆن رێكیاندەخەنەوە؟
- ئەوەی لەم پرسەدا سەیرە، لەلایەك ژمارەیەكی زۆر زۆر فەرمانبەرمان هەیە، لەلایەكی دیكە بۆشایەكی زۆریشمان لەناو وەزارەتەكان هەیە، ئەمە ئاڵۆزە، چونكە وەزیر دێت دەڵێت پێویستم بە فەرمانبەری ژمێریار، ئەندازیار، یان پزیشك هەیە، پێش هەمووشت دەبێت مەسەلەی فەرمانبەری بندیوار كۆتایی پێبێنین، دوو مووچەیی كاری لەسەر كراوە، بەڵام هێشتا ماوە، رێكخستنەوەیەكی فەرمانبەرانمان بەدەستەوەیە كە وەزیری دارایی دەستی پێكردووە، ئەمەش جێگەی بایەخی سەرۆكایەتی ئەنجوومەنی وەزیرانە كە رێكخستنەوەی میلاكات بكەین بە سیستمێكی ئەلكترۆنی، وەسفی وەزیفی بگەڕێنینەوە بۆ ناو دامودەزگاكانی حكومەت و پەیكەری دامەزراوەییمان هەبێت، تابزانین وەزارەتێك پێویستی بە چەند بەڕێوەبەرایەتی هەیە، پێویستیان بە چەند فەرمانبەرە، ئەو فەرمانبەرانە ئەركیان چییە؟ ئەمانە دەبێت هەمووی دیاری بكرێن.


* ئەمە بەشێكی مۆركی دوو ئیدارییە ماوەتەوە، ئایا لەگەڵ بەڕێز نێچیرڤان بارزانی دەرەقەتی حزبەكانتان دێن تا ئەمە راست بكەنەوە؟
- پێش هەموو شت یەكێتی و پارتی ئێمەیان ناردۆتە ئەم حكومەتە، بۆ ئەوەی چاكی بكەین، نەك تێكی بدەین.


* مەبەستم ئەوەیە تاچەند گرنگە پارتی و یەكێتی پشتگیریتان بكەن؟
- بە ئیحترامەوە من ناتوانم بەناوی پارتییەوە قسە بكەم، بەس دڵنیام بەڕێز سەرۆكی حكومەت دەرەقەتی حزبی خۆی دێت و لێی ناترسم، خوێنەرانی گۆڤارەكەشتان دڵنیا دەكەمەوە یەكێتیش باوەڕی بە چاكسازی ئیداری هەیە، باوەڕی بەوە هەیە كە ئیتر ناتوانین بەم سیستمە نەك هەر هەرێمێك بەڵكو لەداهاتوو دەوڵەتێك بەرین بەڕێوە، لەبەر ئەوەی ئەگەر بمانەوێت كوردستان باشتر بكەین، دەبێت سیستمی حوكمڕانیمان باشتر بكەین، ئەمە بۆتە راستییەك هەموو لایەك تێیگەیشتوون. ئەمە پێویستی بە هەموو لایەكە، ئەمجارە حكومەتەكەمان شێوەیەكی دیكەی هەیە، حكومەتێكی بنكە فراوانە هەموو لایەنەكان تێدا بەشدارن، ئەركەكەش دابەشكراوە بەسەر هەموو ئەو حزبانەی كە بەشدارن لەناو حكومەتەكە، هەتا ئێستا نییەتێكی جدیش بۆ ئەو چاكسازییە هەیە.


* بەڵام ئەوەی دەیبینین شتێكی ترە، لەنێوان پارتی و یەكێتی هەتا ئێستا لە راگەیاندنەكان شەڕەدەنووك هەیە، ئایا ئەمە كاریگەری لەسەر حكومەت نابێت؟
- من دەمەوێت راستییەك بڵێم كە پارتی و یەكێتی وەك دوو حزب زۆر لێكجیاوازن، بۆیە ململانێی حزبی شتێكی سرووشتی و تەندروستە، بەو مەرجەی لە سندوقی هەڵبژاردندا كێشەكان چارەسەر بكرێت، ژینگەی سیاسی كوردستانیش گەیشتۆتە ئەو ئاستەی لەوە تێبگات، كە مەرج نییە یەكێتی و پارتی لەسەر هەموو شتێك كۆك بن، بەڵام بەداخەوە لە سەرەتای شەڕی دژی داعش، دەبوو ئەم شەڕە ببوایە بە هۆكارێك بۆ یەكخستنەوەی كوردستانەكەمان، راگەیاندنە حزبییەكان لەسەرەتا زۆر تەسك و حزبییانە سەیری رووداوەكانیان دەكرد، كوردستانییانە بیریان نەدەكردەوە. بەڵام ئێستا ئەوە چارەسەر كراوە، ئێستا سەیری راگەیاندنەكان دەكەم كوردستانیتر بابەتەكان باس دەكرێن، پێشڕەوی پێشمەرگە لە زوممار پێشڕەوی كوردستانە بە هەمان شێوە پێشڕەوی پێشمەرگە لە جەلەولا و سەعدیە پێشڕەوی كوردستانە، ئەمە دەبێت لێی تێبگەین و پێشموایە لێی تێگەیشتووین. بەدرێژایی مێژووی خۆمان هەر كاتێك حزبییانە بیرمان كردۆتەوە، زیانمان لە میللەتی خۆمانداوە.


* كێشەیەكی دیكە كە ئێستا بە سەرۆكایەتی وەزیری ناوخۆ لیژنەتان بۆ داناوە، بازرگانیكردنە لەگەڵ تیرۆریستانی داعش، ئایا ئەم پرسە بەڕاستی بوونی هەیە؟
- ئەم لیژنەیە بە بڕیاری ئەنجوومەنی وەزیران دامەزراوە و لەو كاتەوە ئەم لیژنەیە كە بەڕێزان وەزیری ناوخۆ، وەزیری پێشمەرگە، وەزیری سامانە سروشتییەكان و سەرۆكی ئاسایشی گشتی هەرێمی كوردستان، زۆر بە جددی كاریان لەسەر ئەم پرسە كردووە و زانیارییەكی زۆریان كۆكردۆتەوە، پێموایە موبالەغەیەكی گەورە كراوە لەسەر قەوارەی ئەو بازرگانییەی لەگەڵ داعش كراوە، بەڵام هیچ دوكەڵێكیش بێ ئاگر نییە، شتێك هەر هەبووە، بۆیە كاری لەسەر كراوە و وەزیری ناوخۆش رایگەیاندووە، ئێستا چەندین كەس كە گومان هەبووە بەشداربوون لەوكارە، لە ژێر لێكۆڵینەوەدان، بەڵام ئەمە تاوانێكی نەتەوەییە و نابێت بە كەم وەریبگرین، لەبەر ئەوەی ئێمە لەلایەك شەڕ لەگەڵ خەڵكانێك دەكەین كە نەك هەر دەیەوێت لەناومان بەرێت، بەڵكو دەیەوێت بمانگێڕێتەوە بۆ سەدەی حەوتەمی زایینی، لەلایەكی دیكە خەڵكێك هەبێت لەبەر چەند پولێك ئەو كارە بكات، ئەمە بەهیچ شێوەیەك قابیلی قبووڵكردن نییە و قبووڵیش ناكرێت.


* ئەم لیژنەیە تەنیا لە بارزگانی نەوت لەگەڵ داعش لێكۆڵینەوە دەكات، یان لەسەر هەموو جۆرە بارزگانییەك، وەك كڕینی ئۆتۆمبێل بۆ تیرۆریستان و ناردنی گاز بۆیان لێكۆڵینەوە دەكات؟
- من دڵنیام لە میانەی بەدواداچوونی ئەم پرسە لەوانەیە شتی جۆراوجۆری دیكەش دەربكەوێت، بەڵام نامەوێت پێش لیژنەكە بكەوم، چونكە ئەوان لەناو وردەكاری لێكۆڵینەوە و بەدواداچووندان.


* بەڕێزتان ئاگادارن لەسەر داوای بەڕێز مسعود بارزانی سەرۆكی هەرێمی كوردستان و پاش رەزامەندی پەرلەمان هێزی پێشمەرگە لە هەرێمی كوردستانەوە چوو بۆ هاوكاری براكانی لە كۆبانێ، ئەم رووداوە چۆن سەیر دەكەن؟
- چوونی هێزی پێشمەرگەی كوردستان لە هەرێمی كوردستانەوە بۆ رۆژئاوا رووداوێكی مێژووییە، هەروەها شەڕكردنی هێزی پێشمەرگە لە كۆبانێ شان بەشانی شەڕڤانان دیسان رووداوێكی مێژووییە، لەمەش زیاتر كاریگەری هەبووە لەسەر گۆڕینی هاوكێشەی شەڕەكە و وەرگرتنەوەی بەشێكی كۆبانی كە ئێستا لەبەردەستی هێزەكانی كوردستانە، بۆیە ئەگەر هاوكاری هێزی پێشمەرگە و هاوكاری هاوپەیمانان نەبوایە ئێستا كۆبانێ بە تەواوەتی كەوتبووە دەستی تیرۆریستانی داعش. لەمەش زیاتر كێ لە ئێمە مەزندەی دەكرد، رۆژێك بێت هێزێك لە هەرێمی كوردستانەوە بچێتە توركیا و لە توركیا بچێتە رۆژئاوای كوردستان، ئەمە هەر ئاسانیش نەبوو، پێویستی بە بڕیارێكی سیاسیی كوردستان بوو، پێویستی بە بڕیارێكی زۆر بوێرانەی سەركردەی كوردستان بوو، پێویستی بە بڕیاری پەرلەمانی كوردستان بوو، پێویستی بە رەزامەندی دەوڵەتی توركیا بوو كە زۆر بە گومانەوە سەیری پرسەكەی دەكرد، ئەو بڕیارەی توركیاش ئاسان نەبوو، ئێستا ئەمانە هەمووی روویانداوە و هیوادارین دوای سەركەوتن ئەو پێشمەرگانە بە سەلامەتی بگەڕێنەوە لامان. ئەوانە وەك پاڵەوانی نەتەوە سەیر دەكرێن و پێویستە بە گوڵباران پێشوازییان بكەین.


* هێزی پێشمەرگەی كوردستان لە هەرێمی كوردستانیش ئاڕاستەی شەڕەكەی گۆڕیوە لە بەرگرییەوە بۆ پێشڕەوی، ئەمەش لە زوممارەوە تا جەلەولا و سەعدیە، ئایا ئەم وەرچەرخانە چۆن هەڵدەسەنگێنن؟
- ئەم شەڕە هەر لەسەرەتاوە شەڕێكی نەخوازراو بووە و ئێمە ئەم شەڕەمان نەویستووە و یەخەی گرتووین، هەندێك خەڵك هەن كە لە سەرەتا رەخنەیان لە حكومەتی هەرێمی كوردستان دەگرت و پێیانوابوو كە داعش هاتە ناو موسڵ دەبوو كورد بچووایە شەڕی داعشی لە ناو موسڵ بكردایە، من پێموایە ئەوە رەخنەیەكی نادروست و ناڕەوایە. لەبەر ئەوەی من دڵنیام ئەگەر ئەوەمان بكردایە هەر ئەو كەسانە رەخنەیان لێدەگرتین كە بۆچی خۆتان تووشی ئەو شەڕە دەكەن و دەیانگوت ئەمە كەی شەڕی ئێمەیە، كە ئەم شەڕە روویدا و سوپای عێراق تێكشكا، بڕیارێكی سیاسیی كوردستان و پێشمەرگە ئەو ناوچانەی پاراست، بۆیە لە سەرەتادا ئەگەر شڵەژانێكیش لە هێزی پێشمەرگە هەبووبێت، لەبەر ئەوەبوو شەڕێكی لەناكاو و تازە بوو بۆ پێشمەرگە، بەڵام دوای ماوەیەكی كەم هەم لە تاكتیكی دوژمن شارەزا بووین و هەم توانیمان باشتر هێزەكانی خۆمان رێكبخەینەوە و هەمیش ئاڕاستەی شەڕەكە لە بەرگری كردنەوە بگۆڕین بۆ هێرشكردن، ئەوەتا خۆمان دەبینین بەڕێز سەرۆكی هەرێمی كوردستان خۆی چووە سەركردایەتی شەڕەكانی كردووە لە زوممار، بوونی جەنابی سەرۆكی هەرێمی كوردستان لەو ناوچەیە بێگومان ورەی پێشمەرگە بەرز دەكاتەوە، وا لەفەرماندەكانی هێزی پێشمەرگە دەكات زیاتر هەڵمەت بەرن بۆ ئەوەی شەڕەكە ببنەوە، بۆیە ئیستا لە زوممارەوە تا جەلەولا هەر ئەوەندە نییە تەنیا فەرماندەی سەربازی لە پێشەوەی شەڕەكان بن، بەڵكو كادری سیاسی زۆر پێشكەتوو شان بەشانی فەرماندە سەربازییەكان لە پێشەوەی بەرەكانی شەڕن، ئەمە جێگەی شانازییە، هەست دەكەین یەكڕیزییەكی زیاتر لەناو خەڵكی كوردستان دروستبووە، كە دەبینین خەڵك لە دهۆك پێی خۆشە كە جەلەولا ئازاد كراوە و لە سلێمانی خەڵكی دڵخۆشە كە زوممار ئازاد كراوە، بەڵام ئەم شەڕە درێژخایەنە، رزگاركردنی هەموو ناوچەكانیش پێویستییان بە پلانی درێژخایەن و وردە، تەنها ئازادكردن لە رووی سەربازییەوە نییە، بەڵكو دەبێت پلانیش هەبێت دوای ئازادكردن چۆن دەیپارێزین.


* دوایین پرسیارمان سەبارەت بە جەنابی مام جەلالە، دیارە هاتنەوەی جەنابی مام جەلال بۆ كوردستان جێگەی خۆشحاڵی هەموو لایەك بوو، حەزدەكەین لە زمانی بەڕێزتەوە سەبارەت بە جەنابی مام جەلال و تەندروستی بەڕێزیان بزانین؟
- سوپاس بۆ پرسیارەكەتان، بێگومان هاتنەوەی مام جێگەی خۆشحاڵی بوو بۆ هەموو كوردستان، بەدەر لە رەنگ و ئەو شتانە، لەوەتەی گەڕاوەتەوە بۆ كوردستان لە رووی مەعنەوی و دەروونییەوە زۆر باش بووە، لە رووی تەندروستیشەوە باشتر بووە، ئێستا رۆژانە دۆستەكانی دەبینێت، شاندەكان دەچن بۆلای، هەست بە ژیانێكی ئاساییتر دەكاتەوە، بە بەراورد بەو ماوەیەی لە دەرەوە بوو، بەڵام بەداخەوە بەهۆی سەرقاڵی رۆژانە و كێشەی شەڕ و دارایی و داعش، ئەوەندە دەرفەتم نەبووە، وەك پێویست بیبینم و سەردانی بكەم، بەڵام كە دەچمەوە سلێمانی بێگومان سەردانی دەكەم، بەڵام گەڕانەوەی مام بۆ كوردستان بۆ هەموومان لە رووی مەعنەوییەوە زۆر گرنگ بوو.