لەنیا سەدیق یاریزانی تۆپی فوتساڵ
نەکردنەوەی پاڵەوانیەتی ھۆکارێکە بۆ وازھێنانی کچان لە یاری فوتساڵ
شاری سلێمانی لە مێژووی وەرزشی خۆی خاوەنی چەندین یاریزانی بەتوانایە لە ھەردوو ئاستی کوڕان و کچان ، یانەی وەرزشیی ئەفرۆدێت یەکێک لەم یانانەی کە تایبەتە بە یارییەکانی ئافرەتان لە شاری سلێمانی و تیپی تۆپی فوتساڵی یانەکەش یەکێک لە تیپە ھەرە بەھێزەکانی سەر ئاستی ھەرێمی کوردستان و عێراقە کە خاوەنی چەندین ئەنجامی شایستە و کچە یاریزانانی بەتوانایە بەڵام بەھۆی گرفتیان لەگەڵ کارگێڕی یانەکە ژمارەیەکی زۆر لە یاریزانانی یانەکە ریزی تیپەکەیان جێھێشتووە و تاکو ئێستاش نەچوونەتە ھیچ یانەیەک ، یەکێک لە یاریزانە بەتواناکانی یانەکەش کچە یاریزان لەنیا سەدیق ئەو بە ئاستە بەرزەکەی ھەموولایەکی سەرسام کردووە کە خاوەنی چەندین ئەنجامی شایستەیە لەگەڵ یانەکەی لە ھەردوو خولی نایابی تۆپی پێی کوردستان و عێراقیش ئێستاش لەگەڵ ھیچ یانەیەک یاری ناکات تەنیا لەگەڵ تیپەکەی ڕاھێنەر عەباس فەرەج ماوەتەوە، ناوبراو لەدایک بووی ساڵی ١٩٩٨ی شاری سلێمانیە و قوتابی لە زانکۆی سلێمانی ئێمەش لە نزیکەوە چەند پرسیارێکمان ئاڕاستەی کرد ئەویش وەڵامی پرسیارەکانی گۆڤاری گوڵانی دایەوە.
کارزان کانەبی
*ئاستی یاری تۆپی فوتساڵ چۆن دەبینی ؟
-تاڕادەیەک بەرەووپێشچووە لە چاو ساڵانی پێشووتر ، بەڵام ھێشتا لە ئاستی پێویست نییە.
*ئەنجامدانی پاڵەوانیەتی کەم تا چەند دەبێتە ھۆکار بۆ ئەوەی ئاستی ئەم یارییە بەرەوو پێش نەچێت؟
-بێگومان کاریگەری دەبێ لەسەر ئاستی یاریزانان و یانەکانیش، نەکردنەوەی پاڵەوانیەتی ھۆکارێکە بۆ وازھێنانی کچان لە یاری فوتساڵ.
*پێت باشە چی بکرێت بۆ ئەوەی یاری تۆپی فوتساڵی کچان بەرەوو پێش بچێت؟
-پێم باشە زیاتر گرنگی بە کچە وەرزشکاران بدرێت ، ھیواداریشم کچان زیاتر پەرە بەم یارییە بدرێت تواناکانیان زیاتر بەرەووپێش بچێت.
*گرفتی یارییەکانی تۆپی فوتساڵ لە چی دەبینی؟
-گرفتی ئەم یارییە لەوەدایە کەوا خول و پاڵەوانیەتی بە بەردەوام ناکرێتەوە، ئەم چەند ساڵە خول بە کەمی کراوەتەوە ئەوەش گرفت بۆ یاریزانان درووست دەکات و دەبێتە ھۆی بێزاری.
*لە ھیچ یانەیەک گرێبەستت پێشکەش نەکراوە؟
-نەخێر چونکە من سەرەتایی دەستپێکردنمە.
*بەنیازی چی بۆ داھاتووی خۆت وەکو کچە یاریزانێک؟
-بەنیازی ئەوەم داھاتوویەکی گەورە بۆ خۆم درووست بکەم بە پشتیوانی ڕاھێنەر و یاریزانانی ھاورێم.
*لەگەڵ ئەوەی یانەکان پشت بە ڕاھێنەر و یاریزانی بیانی ببەستن؟
-نەخێر ھیچ کات لەگەڵ ئەوە نیمە پشت بەتوانای یاریزانی بیانی ببەسترێ چونکە یاریزانانی شارەکانی کوردستان ئاستیان زۆر بەرزە ئەگەر گرنگی تەواویان پێ بدرێت.
*بۆچی یانەی ئەفرۆدێتان جێھیشت؟
-بەلێ ھەرچەندە من ماوەیەکی کەمە پەیوەندم بەم یانەیە کردوە ، بەڵام ھۆکاری پەیوەندی کردنم بەھۆی ڕاھێنەرەکەم بوومامۆستا عەباس، پشتگیری تەواومان نەبووە جگە لەم ڕاھێنەرە ، بۆیە بڕیارماندا لەگەڵ ئەوە بین .
*داواکاری و پێشنیارت بۆ لایەنی بەرپرسی وەرزشی؟
-ھیوادارم گرنگی زیاتر بە وەرزش بدرێت ، خزمەتی زیاتری کچە وەرزشکاران بکرێت لەسەر ئاستی ھەرێمی کوردستان.
*خەونی وەرزشیت چیە وەکو یاریزانێک؟
-خەونی من تەنیا خزمەت کردنە بە وەرزشی شاری سلێمانی.
*بەھیوای ئەوەنیت ھەڵبژاردەی کوردستان دابمەزرێ و تۆش یەکێک بیت لە یاریزانانی ھەڵبژاردەکە؟
-بەلێ بێگومان ئەوە خەونی من و ھەموو یاریزانەکانی ترە کە ئەم ھەوڵە بدەین و ئێمەش خزمەتی زیاتر بکەین لە رێگای ھەڵبژار دەکەمان.
*لە ھەڵبژاردەی تۆپی پێی عێراق داواکراوی؟
- بەلێ داواکراوم.
*بەچ یاریزانێکی جیھانی سەرسامیت؟
-زۆر بە ئاستی کریستانۆ رۆناڵدۆ سەرسامم و حەز دەکەم بگەمە ئاستی ئەو.
*ئەگەر شتێکت ماوە لە کۆتایدا؟
-زۆر سوپاس بۆ گۆڤاری گوڵان کە ھەموو کات جێگای رێزی ئێمەن چونکە بەردەوام لە خزمەتی وەرزشکارانی شارەکانی کوردستانن بە بێ جیاوازی، سوپاس بۆ مامۆستا عەباسی ڕاھێنەرەکەم کە زۆر ماندووە لەگەڵمان.