رۆژی سێشەممە لە شاری هەولێر كۆتایی بە پاڵەوانێتی تۆپی دەستی یانەكانی هەولێر هات، كە تیاییدا هەریەكە لە یانەكانی (هەولێر، مەخمور، ئارارات، سۆران) بەشدارییان كردبوو و یانەی هەولێر بووە پاڵەوانی خولەكە.
لە یاری كۆتاییدا هەردوو یانەی هەولێر و ئارارات رووبەرووی یەكتر بوونەوە لە یارییەكی ئاست بەرزدا یانەی هەولێر توانی یارییەكە بە ئەنجامی (21-14) گۆڵ بباتەوە و ببێتە پاڵەوانی خولەكە.
لەگەڵ تەواوبوونی یارییەكە بەئامادەبوونی بێجان ئیبراهیم سەرۆكی یەكێتی تۆپی دەستی كوردستان و كامەران محەمەد سەرۆكی نوێنەرایەتی هەولێر-ی لێژنەی ئۆڵۆمپی كوردستان و دكتۆر ئالان قادر ئەمینداری گشتی لێژنەی ئۆڵۆمپی كوردستان مەراسیمی خەڵات دابەشكردن بەسەر تیپە سەركەوتووەكان ئەنجامدرا و هەروەها لە لایەن یەكێتی تۆپی دەستی لقی هەولێر چەند خەڵاتێكی تر دابەش كرا بەمشێوەیە:
باشترین یاریزانی پاڵەوانێتیەكە: محەمەد تاریق یانەی ئارارات
باشترین یاریزانی نموونەیی: رێباز ئەكرەم یانەی هەولێر
باشترین گۆڵپارێز: زمەن فوئاد گۆڵپارێزی یانەی ئارارات
گۆڵكاری پاڵەوانێتیەكە: محەمەد خەسرەو یانەی هەولێر
باشترین بەرگریكار: رەوا یوسف یانەی هەولێر
راهێنەری نموونەیی: شێروان یوسف یانەی هەولێر.
ئەم پاڵەوانێتیە بەسەرپەرشتی یەكێتی تۆپی دەستی لقی هەولێر و بەهاوكاری نوێنەرایەتی هەولێری لێژنەی ئۆڵۆمپی كوردستان و بە چاودێری یەكێتی تۆپی دەستی كوردستان ئەنجامدرا.
رێبین رەمزی
فۆتۆ: ئەحمەد جەلال