یانەی دهۆك بەفەرمی بەشداریكردنی خۆی لە خولی نایابی كوردستان بۆ تۆپی پێی راگەیاند، بۆ ئەم مەبستە دەستەی راهێنەران دەستنیشانكران، لەمباریەوە محەمەد عەلی بەرپرسی راگەیاندنی یانەی دهۆك لە لێدوانێكی تایبەتدا گوتی: بەفەرمی یانەی دهۆك دەستەی راهێنەرانی دەستنیشانكرد، كە پێكهاتووە لە (ئاشتی مستەفا) راهێنەر و ( زێرەڤان سەعدوڵڵا) یاریدەدەری راهێنەر و ( حەیدەر كازم) راهێنەری گۆڵپارێز و (د.ئازاد) راهێنەری لێهاتووی جەستەیی تیپەكەیە.
سەبارەت بە هۆكاری دوورخستنەوەی هەشت یاریزان لە پێكهاتەی یانەكە محەمەد عەلی گوتی: لەسەر راسپاردەی راهێنەر هەشت یاریزان لە ریزی یانەكە دوورخرایەوە، كە لە شوێنی ئەو یاریزانانە یاریزانی لاو و باشتر هەبوو بۆیە ئەم یاریزانانە دوورخرانەوە، كە یاریزانەكانیش بریتین لە ( یادگار یونس، وەلید سەلمان، محەمەد زوهێر، زێرەڤان رەمەزان، عامر فازڵ، بابین عەبدولعەزیز، كۆڤان حوسێن) و لە هەمان كاتدا یانەكەمان 10 یاریزانی تیپی لاوانی سەرخست تاوەكو لەگەڵ یانەكە بەشداری لە خولی نایابی كوردستان بكەن.
لە كۆتایی قسەكانیدا محەمەد عەلی گوتی: وا بریارە سبەی دووشەممە لە شاری هەولێر یانەكەمان ئۆردوگایەكی مەشقی ئەنجام بدات بۆ ماوەی هەشت رۆژ، رۆژانە بەیانیان و ئێواران مەشقی خۆمان ئەنجامدەدین لە هەردوو یاریگەی یانەی هەولێر و هەندرێن، لەم ئۆردوگا مەشقیە هیچ یارییەكی دۆستانە ئەنجام نادەین.
رێبین رەمزی