رۆژنامەی بیبۆلی بەریتانی ڕایگەیاند كە هەریەك لەیانەكانی ڕیال مەدرید و ئینتەرمیلان بایەخیان بەتواناكانی یاریزانی هەڵبژاردەی ئۆرگوای لویس سوارێز هێڕشبەری یانەی لیڤەرپول داوە بۆ ئەوەی بۆندی لەگەڵ مۆر بكەن، سوارێز خاوەن بنكەیەكی جەماوەری فراوانە لەلایەن هاندەرانی یانەی لیڤەرپول و ڕاهێنەری یانە كینی دالگلیش یەكێكە لەوانەی كە سەرسامە بەئاستی سوارێز، هەربۆیە لەكاتی تاوانباركردنی بەدیاردەی ڕەگەزپەرستی بەتەواوی پشتگیری لەیاریزانەكەی خۆی دەكرد.
سوارێز بەڕاگرتن بۆ ماوەی 8 یاری ڕاگیراوە بەتۆمەتی پەیڕەوكردنی دیاردەی ڕەگەزپەرستی لەبەرامبەر یاریزانی یانەی مان یونایتد پاتریس ئێڤرا و واچاوەڕوان دەكرێت لەیاری بەرامبەر تۆتنهام لەڕۆژی 6/2/2012 بگەڕێتەوە ڕیزی یانەكەی، بەڵام لێپرسراوانی یانەی لیڤەرپول لەوە دەترسن كە ئاستی دابەزێت بۆ هۆی یاری نەكردنی بۆ ماوەیەكی درێژخایەن، یانەكانی ڕیال و ئینتەر دەیانەوێ ئەم دەرفەتە بقۆزنەوەو پەلكێشی ڕیزەكانی یەكێك لەم دوو یانەیەی بكەن.