یاریزان و ئەفسانەی تۆپی پێی فەرەنسی زێنەدین زێدان راوێژكاری سەرۆكی یانەی ریال مەدرید متمانەی خۆی بە تواناكانی راهێنەر جۆزی مۆرینهۆ دووپات كردەوە، بەڵام مۆرینهۆی ئاگاداركردەوە لە شكستەكانی یانەی شاهانە لە بەرامبەر یانە بچوكەكانی خولی ئیسپانیا كە دەبێتە هۆكاری لە دەستدانی نازناوەكە لە كۆتایی وەرزدا.
زێدان لە لێدوانێكیدا بۆ رۆژنامەنووسان گوتی: ریال مەدرید یانەیەكی گەورەیە و باشترین یانەی جیهانە، جۆزی مۆرینهۆ باش دەزانێت كە كارگێڕان و یاریزانان و هاندەران متمانەیان پێی هەیە، ئێمە هەموومان دەزانین كە هەموو یانەكانی جیهان بە كاتێكی خەراپ تێدەپەڕن، بەڵام دەمەوێ مۆرینهۆ ئاگادار بكەمەوە كە دۆڕندنی 4 یاری لەوانەیە ببێتە هۆكاری لەدەستدانی نازناوی خولی ئیسپانیا، بەڵێ دۆڕاندن لە 4 یاری ماندووبوونی وەرزێك بە فیڕۆ دەدات، بۆیە پێویستە هەمووان بەیەكەوە كاربكەین، من متمانەی تەواوم هەیە كە دەتوانین دەسكەوتی گەورە بەدەست بهێنین، مۆرینهۆش باش دەزانێ چ ئەركێكی گەورەی لەسەر شانە و دەبێ هەردەم بۆ سەركەوتن یاری بكات.