كاسێتی ریكۆرده‌ر (شریت) بۆ ماوه‌ی ده‌ ساڵ ده‌بێت له‌م ناوچه‌یه‌ی ئێمه‌دا چۆته‌ ناو ئه‌رشیفه‌وه‌ و نه‌ماوه‌، له‌ راستیدا كاتێك جیهانی دیجیتالی پێشكه‌وت و "پله‌یه‌ره‌" بچووكه‌كان به‌رهه‌م هاتن ورده‌ورده‌ كاسێت و "ته‌سجیل"یش بۆ یه‌كجاری نه‌مان و تۆمارگه‌كان داخران.. هه‌رچه‌نده‌ زۆر كه‌س بیره‌وه‌ری و یادگاریان له‌گه‌ڵ ئه‌م كاسێتانه‌ هه‌یه‌، بۆ ئه‌م مه‌به‌سته‌ جارێكی دیكه‌ كۆمپانیایه‌ك كاسێتی جۆری (mixtape) به‌رهه‌م هێناوه‌ته‌وه‌ به‌ توانایه‌كی دیكه‌وه‌.
كاسێتی ئه‌مجاره‌ هه‌م ریكۆرده‌ره‌ و هه‌م كاسێت، بۆ كاركردنی پێویست ناكات ریكۆرده‌رێك هه‌بێت به‌ڵكو خۆی كاره‌كه‌ ئه‌نجام ده‌دات. "میكس تیپ" خۆی شاشه‌یه‌كی له‌مسی هه‌یه‌ و بلوتوسی هه‌یه‌ و له‌گه‌ڵ زۆربه‌ی ئامێره‌كانی ئه‌م سه‌رده‌مه‌ ده‌گونجێت. ده‌توانرێت له‌ رێگای كێبڵه‌وه‌ به‌ كۆمپیوته‌ره‌وه‌ په‌یوه‌ند بدرێ و گۆرانی و مۆسیقای له‌سه‌ر دابندرێ.
زۆربه‌ی فۆرماته‌ ده‌نگییه‌كان ده‌خوێنێته‌وه‌، شوێنی دانانی میمۆری هه‌یه‌ و له‌ناو خۆیدا میمۆرییه‌كی 8 گیگابایتی هه‌یه‌ و شه‌حن ده‌كرێته‌وه‌.
خاڵی جێگای سه‌رنجی كاسێته‌ نوێیه‌كه‌ ئه‌وه‌یه‌ ده‌توانرێت به‌ ریكۆرده‌ره‌ كلاسیكیه‌كان، وه‌كمه‌ن و یان ریكۆرده‌ی ئۆتۆمبیل سوودی لێوه‌ربگری. له‌كاتی بڵاوكردنه‌وه‌ی گۆرانییه‌كدا دوو دوگمه‌كانی ناوه‌ندی وه‌ك كاسێت ده‌سوڕێن.