هەفتەی جیهانیی شیرپێدانی سروشتی دایک هەموو ساڵێک لە ١/٨ بۆ ٧/٨ لە ١٢٠ وڵاتی جیهان ئەنجامدەدرێت وەک پەیامێک بۆ بەرزکردنەوەی ئاستی هۆشیاری کۆمەڵگە لە بارەی سوودە سرووشتییەکانی شیرپێدانی دایک هەم بۆ منداڵەکە و هەم بۆ دایکەکە، لەم هەفتەیەدا لە سەرانسەری جیهان چەندین چالاکی جۆراوجۆر ئەنجام دەدرێت لە رێگەی چالاکی مەیدانی و نووسین و کۆنفرانس و هتد..

هەرچەندە پێدانی شیری دایک بە منداڵی تازە لەدایکبوو بە مافێکی دایکەکە دادەنرێت و دایک ئازادە لە دان یان نەدانی ئەو بڕیارە، بەڵام ئەکادیمیای ئەمریکی بۆ پزیشكی منداڵان داوا لە دایکان دەکات کە شیری خۆیان بدەن بە منداڵەکانیان.

سوودەکانی شیری دایک بۆ منداڵ

١- شیری دایک بە نزیکەیی گشت ئەو پرۆتین و چەوری و کانزا و ڤیتامینانەی تێدایە کە بۆ گەشەی منداڵ پێویستن، هەموو ئەو بەها خۆراکییانەی بە شێوەیەک تێدایە کە بە ئاسانی لەلایەن منداڵەکەوە هەرس دەکرێت.

٢- شیری دایک دەبێتەهۆی کەمکردنەوەی مەترسی تووشبوون بە ڕەبۆ یان حەساسیەت لە منداڵدا.

٣- دەرکەوتووە ئەو منداڵانەی لە شەش مانگی یەکەمی تەمەنیاندا شیری دایکیان پیدەدرێت کەمتر تووشی نەخۆشییەکانی گوێچکە و کۆئەندامی هەناسە دەبن، کەمتر تووشی سکچوون دەبن و کەمتر لە نەخۆشخانەکاندا دەخەوێنرێن.

٤- توێژینەوەکان ئاماژە بەوە دەکەن کە شێرپێدانی سروشتی دایک دەبێتەهۆی بەرزکردنەوەی ئاستی زیرەکی منداڵەکە، جگەلەمەش ئەو پەیوەندییە جەستەییەی لە نێوان منداڵەکە و دایکەکە دروستدەبێت لەکاتی شیرپێدان دەبێتەهۆی ئەوەی منداڵەکە لە رووی دەروونییەوە زیاتر ئاسوودە بێت.

٥- ئەو منداڵانەی شیری دایکیان دەخۆن چانسی قەڵەوبوون و تووشبوون بە نەخۆشی شەکرەیان کەمترە کاتێک گەورەتر دەبن.

سوودەکانی شیرپێدانی دایک بۆ دایکەکە خۆی

١- شیرپێدان دەبێتەهۆی ئەوەی دایکەکە کالۆری زیاتر بسووتێنێت، ئەمەش هاوکاری دەکات کێشی لەشی خۆی کەمبکاتەوە لەدوای زیادبوونی بەهۆی دووگیانبوونەوە.

٢- شیرپێدانی سروشتی دەبێتەهۆی دەردانی هۆڕمۆنی ئۆکسیتۆسین، ئەمەش هاوکاری منداڵدانی دایکەکە دەکات زووتر بگەڕێتەوە قەبارەی ئاسایی خۆی و دەبێتەهۆی کەمبوونەوەی خوێنلێڕۆیشتن لە منداڵداندا لە دوای لە دایکبوونی منداڵەکە.

٣- یەکێكی تر لە سوودە هەرە گرنگەکانی شیرپێدانی دایک بریتییە لە کەمکردنەوەی مەترسی تووشبوون بە نەخۆشی شێرپەنجەی هێلەکەدان و پووکانەوەی ئێسک.