پشكنینی هێمۆگلۆبینی گلوكۆزبوو Glycohemoglobin یان HbA1c گرنگە بۆ زانینی رادەی كۆنترۆلكردنی نەخۆشیی شەكرە. جگە لە پشكنینی ئاستی شەكری خوێن، پشكنینی HbA1c رادەی كۆنترۆلكردنی ئاستی شەكری خوێن لە ماوەی 6- 12 هەفتەی رابردوو پیشان دەدات. ئەگەر نەخۆشیی شەكرە كۆنترۆل نەكرێت واتە كە ئاستی شەكری خوێن زۆر بەرزدەبێتەوە، ئەو كاتە شەكری خوێن لەگەڵ هیمۆگلۆبیندا یەكدەگرێت. ئاستی ئاسایی پشكنینی HbA1c بریتییە لە 4- 5.6%، رێژەی HbA1c پتر لە 5.7- 6.4% واتە بوونی ئەگەری تووشبوون بە نەخۆشیی شەكرە، هەروەها رێژەی 6.5% یان زیاتر واتە تووشبوون بە نەخۆشیی شەكرە. بۆ ئەوەی دڵنیابین لەوەی كە نەخۆشیی شەكرە كۆنترۆلكراوە، پێویستە كە ئاستی پشكنینی HbA1c كەمتر بێت لە7%، هەر چەند ئەم رێژەیە بەرزتر بێت هێندە ئەگەری روودانی ئاڵۆزییەكانی شەكرە زیاتر دەبێت. پێویستە لەسەر تووشبووان بە نەخۆشیی شەكرە كە هەر 3 مانگ جارێك پشكنینی HbA1c ئەنجام بدەن، لەسەر ئەو تووشبووانەش كە شەكرەیان لەژێر كۆنترۆلدایە پێویستە كە ساڵانە بەلای كەم 2 جار ئەم پشكنینە ئەنجام بدەن. لە نەخۆشانی شەكرە كە كەمخوێنن یان ئاستی كۆلیستیرۆلیان بەرزە ئەنجامەكانی ئەم پشكنینە هەڵە پیشان دەدەن، هەروەها لە كەسانی تووشبوو بە نەخۆشیی گورچیلە یان نەخۆشیی جگەر.