خۆشەویستیمان بۆ كوردستان و نیشتمان، ئەركی سەر شانی هەموومانە، چونكە كوردستان خاكێكی رەنگینە و سەرتاپای ئەو وڵاتە پڕە لە شتی جوان و دێرین و مێژوویی و كۆن، هەر یەكە ئەمڕۆ سونبول و هێمایەكە بۆ جوانی و پاكی، یەكێك لەو ئاسەوار و ئەشكەوتە كۆنانەی لە سەرەدەمێكی دێرینەوە هەیە، تا ئەمڕۆش ماوە، ئەشكەوتی هەزار مێردە.
مێژوونووسان دەربارەی ئەشكەوتی هەزار مێرد دەڵێن، كە مێژووی دەگەڕێتەوە بۆ سەردەمی بەردینی، كە نزیكەی (5000) پێنج هەزار ساڵ پێش زاین، ئەو ئەشكەوتە دەكەوێتە ناوچەكانی شاری سلێمانی بە درێژی (13) كیلۆمەترەوە بۆ رۆژهەڵاتی ئەو شارە، هەندێك لە لێكۆڵێنەوەكان ئەوە دەردەخەن كە خەڵكی ناو ئەو ئەشكەوتە پێشكەوتووتر بوون لە خەڵكی ناو ئەشكەوتی شاندەرەوە، دوای چەندین لێكۆڵێنەوەی مێژوویی نەگەیشتووتەنە دۆزینەوەی پەیكەر یان ئێسقانی مرۆڤ، تەنیا چەند كەرەستەیەكی شەڕكردن دۆزراتەوە تیایدا، بەڵام ئەوەی پێدەچێت كە خەڵكی ئەو ئەشكەوتە زیاتر گرنگییان بە كشتوكاڵ داوە، كە ئەو ئەشكەوتە بە دووەم كۆنترین ئەشكەوت دادەنرێت لە داوی ئەشكەوتی شانەدەر، ئەشكەوتی هەزارمێرد بە ناوێكی دیكەش ناسراوە، ئەویش ئەشكەوتی تاریكییە، لەبەر ئەوەی لە ژوورەوە زۆر تاریكە و چونكە تیشكی خۆری پێدا ناچێتە ژوورەوە.