وەزارەتی دەرەوەی ئەمریکا دوو لێکۆڵەری ئەمنی سوپای پاسدارانی ئێرانی بە تۆمەتی "ئەشکەنجەدانی زیندانیانی سیاسی و خۆپێشاندەرانی خۆپیشاندانەکانی 2019" سزادا، بەپێی سزاکە خۆیان و تەواوی کەسوکاریانی لە گەشتکردن بۆ ئەمریکا بێبەشدەبن.

ئانتۆنی بلینکن، وەزیری دەرەوەی ئەمریکا لەو بارەیەوە دەڵێت: هەریەک لە عەلی هیمەتیان و مەسعود سەفدەری سزاداوە، "چونکە ئەو دوو لێکۆڵەرە دەستیان هەبووە لە مامەڵەی دڕندانە و ئەشکەنجەدانی زیندانیانی سیاسی و ئەوانەی بەشدارییان لە خۆپێشاندانەکانی 2019 و 2020 کردووە".

لە بەشێکی دیکەی راگەیێندراوەکەدا بلینکن دەڵێت: "ئەمریکا بەردەوامدەبێت لە بەکارهێنانی هەموو کارتێکی شیاو بۆ سزادانی ئەوانەی بەرپرسن لە پێشێلکردنی مافەکانی مرۆڤ و ئەشکەنجەدان لە ئێران"، هەروەها دەشڵێت: ئەمریکا لەگەڵ هاوپەیمانەکانیشی لەسەر هێڵ دەبێت بۆ سزادانی ئەوانەی دەستیان لە پێشێلکارییە مرۆییەکان هەیە.

لە کۆتایی پەیامەکەیدا وەزیری دەرەوەی ئەمریکا دەڵێت واشنتن بەردەوامدەبێت لە پاڵپشتیکردنی مافەکانی خەڵکی ئێران و داواش لە حکومەتی ئێران دەکەین بەڕێزەوە مامەڵە لەگەڵ خەڵکەکەی بکات.
rudaw -