112 ئەندامی دیموکرات و کۆماریی ئەنجوومەنی نوێنەرانی ئەمریکا لە نامەیەکدا داوا لە سەرۆکی ئەو وڵاتە دەکەن رێگە لە هەوڵەکانی ئێران بۆ تێکدانی سەقامگیریی وڵاتان و تیرۆرکردنی دژبەرانی بگرێت.

ئەندامانی ئەنجوومەنی نوێنەرانی ئەمریکا بە ئاماژەدان بە سزادانی دیپلۆماتکارێکی ئێرانی لە بەلجیکا بەهۆی دانانی پلانی تەقاندنەوەی گردبوونەوەیەکی دژبەرانی کۆماری ئیسلامی لە پاریس، داوا دەکەن حکومەتی ئەمریکا بە هاوکاریی وڵاتانی ئەوروپایی رێگە لە هەوڵی لەو شێوەیەی کۆماری ئیسلامیی ئێران بگرێت و رێگە نەدەن ئیدی دژبەرانی تیرۆر بکات و وڵاتانی دیکە ناسەقامگیر بکات.

ئەو ئەندامانەی کۆنگرێس لە نامەکەیاندا ئاماژەیان بە سەرکوتی ناڕەزایەتییەکانی خەڵک لە لایەن هێزەکانی ئێران و هەروەها پێشێلکردنی مافی پێکهاتەکان لەو وڵاتە داوە و داوا لە جۆ بایدن دەکەن، پشتگیری لە خواستەکانی خەڵکی ئێران بۆ هێنانەسەرکاری دەسەڵاتێکی دیموکراتیک و سیکۆلار بکات.

نامەکە لە لایەن بێرد شێرمەن، کۆنگرێسمانی دیموکرات و تۆم مەک کلینتاک، کۆنگرێسمانی کۆماری ئامادە کراوە و 110 ئەندامی دیکە لە هەردوو حیزبەکە واژۆیان کردووە.
rudaw -