دوای بڵاوبوونەوەی دەنگۆی کۆچی دوایی رێبەری باڵای ئێران، ئەمڕۆ ژمارەیەک وێنەی نوێی بڵاو کرانەوە.

چەند رۆژێکە بەشێک لە میدیاکان باس لەوە دەکەن، کە ئایەتوڵڵا عەلی خامنەیی، رێبەری باڵای ئێران تووشی پەتای کۆرۆنا بووە و بەهۆیەوە مێشکی لەکار کەوتووە و بەشێکیشیان دەنگۆی کۆچی دواییان بڵاو کردەوە.

میدیا ئێرانییەکان ژمارەیەک وێنەی نوێی عەلی خامنەییان بڵاو کردووەتەوە و رایانگەیاندووە، سەرلەبەیانیی ئەمڕۆ چوارشەممە 16-12-2020، خامنەیی پێشوازیی لە خێزانی قاسم سولەیمانی، فەرماندەی کوژراوی سوپای قودسی ئێرانی، کردووە.

بەرەبەیانی رۆژی هەینی 3-1-2020، سوپای ئەمریکا لەڕێی فڕۆکەی بێفڕۆکەوانەوە، کاروانێکی چەکداریی حەشدی شەعبی لە فڕۆکەخانەی بەغدا بۆردومان کرد.

بەهۆی بۆردومانەکەوە، هەریەکە لە ئەبومەهدی موهەندیس، جێگری سەرۆکی دەستەی میلیشیاکانی حەشدی شەعبی و قاسم سولەیمانی، فەرماندەی سوپای قودسی سەر بە سوپای پاسدارانی ئێران و نۆ بەرپرس و چەکداری دیکەی حەشدی شەعبی، کوژران.

قاسم سولەیمانی، کە لە 11-3-1957 لە گوندی قەنات مەلەک لە شاری کرمان لە باشووری رۆژهەڵاتی ئێران لە دایک بووە. سولەیمانی یەکێک بوو لە فەرماندە و بڕیاربەدەستە باڵاکانی ئێران.









باسنيوز