کۆشکی سەرۆکایەتیی رووسیا (کرملین) روونکردنەوەی لەسەر ئەو دەنگۆیانەی باس لە تووشبوونی سەرۆکی وڵاتەکەی بە نەخۆشییەکی مەترسیدار، دەدات.

دیمیتری بیسکۆڤ، گوتەبێژی کرملین رایگەیاندووە، ڤلادیمێر پوتین، سەرۆکی رووسیا گرنگیی بەو. دەنگۆ و هەواڵانە نادات، کە لەسەر ژیانی خۆی بڵاو دەکرێنەوە.

دیمیتری بیسکۆڤ هەروەها رایگەیاندووە، ڤلادیمێر پوتین بەردەوام رەتی دەکاتەوە هیچ زانیارییەک لەبارەی ژیانی تایبەتیی خۆی و کەسوکارەکەی بڵاو بکاتەوە.

گوتەبێژی کرملین رەتی کردووەتەوە سەرۆکی وڵاتەکەی تووشی هیچ نەخۆشییەک بووبێ و ئەو دەنگۆیانەی باس لەوەش دەکەن، بە مایەی گاڵتە ناوبردووە و رایگەیاندووە، ”سەرۆک پوتین تووشی هیچ نەخۆشییەک نەبووە“.

ئەو لێدوانەی دیمتری بیسکۆڤ دوای ئەوە دێت، کە رۆژنامەی (زە سەن)ی بەریتانی لە راپۆرتێکدا بڵاوی کردبووەوە، کە ڤلادیمێر پوتین تووشی نەخۆشیی پارکینسۆن بووە و ئامادەکاریی دەکات بۆ دەست لەکار کێشانەوە لە ساڵی ئایندە.

نەخۆشیی پارکینسۆن بریتییە لە جۆرێک لە ئیفلیجبوون و دەبێتە هۆی سەختبوونی جووڵەی جەستەی مرۆڤ.








باسنيوز