پەرلەمانی یەکێتیی ئەورووپا لە دانیشتنێ دوێنێ پێنجشەممەدا بە توندی ئیدانەی سیاسەتەکانی تورکیای لە بەرامبەر قوبرسی باکوور کرد و هەوڵەکانی تورکیای بە تێکدانی یەکێتیی نێوان قوبرسی باکوور و باشوور لە قەڵەم داوە و هاوکات داوای سەپاندنی گەمارۆی توندی بۆ سەر تورکیا کردووە.

پەرلەمانی یەکێتیی ئەورووپا بە پەسەندکردنی بڕیارنامەیەک داوای لە وڵاتانی یەکێتیی ئەورووپا کردووە بەهۆی هەڵسوکەوت و سیاسەتی دنەدەرانە کە تورکیا لە دوورگەی قوبرس گرتوویەتە پێش، گەمارۆی توند بەسەر ئەو وڵاتەدا بسەپێندرێت.

یەکێتیی ئەورووپا تورکیا بە هۆکاری پشێوی و دووبەرەکێ لە نێوان دەوڵەتی سەربەخۆی قوبرس و دوورگەی قوبرسی باکوور دادەنێت.

بەپێی یاسا نێودەوڵەتییەکان، باکووری قوبرس وەک بەشێک لە خاکی قوبرسی سەربەخۆ دێتە ئەژمار و هاوکات قوبرسیش وەک ئەندامێکی یەکێتیی ئەورووپا مافی بەرگری لە خۆی هەیە.

کۆماری تورکی قوبرسی باکوور تەنیا لەلایەن ئەنقەرەوە بە فەرمی دەناسرێت و لەڕووی ئابووری و سیاسییەوە سەر بە تورکیایە و نزیکەی ٣٠ هەزار سەربازی تورکیا تێیدا جێگیر کراون.

لە بڕیارنامەکەی یەکێتیی ئەورووپادا هەوڵە سەربازییەکانی تورکیا لە دوورگەی قوبرس بە نایاسایی و یەکلایەنە و دنەدەرانە لەقەڵەم دراوە، هاوکات هەوڵەکانی گەڕان و پشکنینی یەکلایەنەی تورکیا بەدوای غازی سروشتی لە دەریای سپیی ناوەڕاست ئیدانە کراوە.








باسنيوز