ئەنجوومەنی نوێنەرانی رووسیا (دۆما) بەیاننامەیەک لەبارەی شەڕی نێوان ئەرمینیا و ئازەربایجان، دەردەکات.

لە بەیاننامەکەدا، کە ئەمڕۆ سێشەممە 29-9-2020 بڵاو کراوەتەوە، دۆما داوای لە هەردوو وڵات کردووە شەڕ رابگرن و بە دانوستاندن کێشەکانیان چارەسەر بکەن.

دۆما هەروەها رایگەیاندووە، کە هیچ چارەسەرێک بۆ کێشەکە جگە لە چارەسەری ئاشتییانە و دانوستاندن نییە.

ئەنجوومەنی نوێنەرانی رووسیا ئامادەیی خۆی بۆ نێوەندگیریی لەنێوان ئەرمینیا و ئازەربایجان و گەیاندنی هەردوولا بە مێزی دانوستاندنەکان، نیشانداوە.

دوای هەڵوەشانەوەی یەکێتیی سۆڤیەت (رووسیای ئێستا) لە ساڵی 1991، ەئرمینیا و ئازەربایجان لەو وڵاتە جیابوونەوە و سەربەخۆیی خۆیان راگەیاند.

رۆژی یەکشەممە 27-9-2020، سوپای هەردوو وڵاتی ئەرمینیا و ئازەربایجان لە ناوچە سنوورییەکانی دەوڵەتی قەرەباغ، رووبەڕووی یەک بوونەوە و شەڕ تا درەنگانی شەو بەردەوام بوو و رۆژانی دواتریش بە پچڕ پچڕی بەردەوام بوو.

قەرەباغ کۆمارێکی باشووری قەوقازە و لەلایەن هیچ وڵاتێکەوە دانی پێدا نەنراوە. زۆرینەی دانیشتووانی ئەو وڵاتە ئەرمەنین و هەردوو وڵاتی ئەرمینیا و ئازەربایجانیش قەرەباغ بە بەشێک لە خاکی خۆیان هەژماری دەکەن.













باسنيوز