نرخی یەک بەرمیل نەوتی خاوی رێکخراوی هەناردەکارانی نەوت (ئۆپیک)، گەیشتە زیاتر لە 45 دۆلار.

ئەمڕۆ شەممە 15-8-2020، ئۆپیک لە بەیاننامەیەکدا رایگەیاندووە، نرخی یەک بەرمیل نەوتی خاوی سەبەتەی ئۆپیک گەیشتە 45 دۆلار و 34 سەنت.

نەوتی ئۆپیک لە نەوتی 13 وڵاتی بەرهەمهێنەری نەوت پێک دێت، کە بریتین لە وڵاتانی عێراق، جەزائیر، سعودیە، ئیمارات، کوێت، لیبیا، ئێران، ئەنگۆلا، ئیکوادۆر، گینیا، گابۆن، نایجیریا و ڤەنزوێللا.

بەهۆی پەتای کۆرۆناوە، کە تا ئێستا زیاتر لە 21 ملیۆن کەس لە سەرانسەری جیهان تووشی بوون و بەهۆیەوە زۆربەی چالاکییە ئابووری و بازرگانییەکانی جیهان وەستاون، نرخی نەوت بۆ کەمترین ئاست لە 30 ساڵی رابردوودا دابەزی و نرخی یەک بەرمیل گەیشتە 16 دۆلار.

رۆژی یەکشەممە 12-4-2020، ئۆپیک پڵەس (وڵاتانی ئەندام و نائەندامی ئۆپیک) بە مەبەستی بەرزکردنەوەی نرخی نەوت، رێککەوتنێکی مێژووویی بۆ کەمکردنەوەی بەرهەمهێنانی 9.7 ملیۆن بەرمیل نەوتی رۆژانە لە سەرەتای مانگی 5ـی 2020ـەوە، راگەیاند.

ئۆپیک رێکخراوی وڵاتانی هەناردەکاری نەوتی جیهانییە و ئێستا لە وڵاتانی عێراق، سعودیە، ڤەنزوێلا، ئیماراتی عەرەبی، نایجیریا، لیبیا، کوێت، ئێران، گابۆن، ئەنگۆلا و جەزائیر پێک دێت.






باسنيوز