وەزیری تەندروستی لوبنان رایگەیاند، بەهۆی بەرزبوونەوەی ئامارەكانی كۆرۆنا وڵاتەكەیان بۆ ماوەی دوو هەفتە بە تەواوەتی دادەخەن، تەنیا لە فڕۆكەخانەكان پێشوازی لە گەشتەكانی دەرەوە بۆ ناوخۆی وڵاتەكەیان دەكەن.

دوای كۆبوونەوەی لیژنەی زانستی وەزارەتی تەندروستی لوبنان، حەمەد حەسەن، وەزیری تەندروستی ئەو وڵاتە دووپاتی كردەوە، "ناكرێت خۆمان بەدەست دۆخەكەوە بدەین و بەردەوام رووبەڕووی پەتاكە دەبینەوە، هیچ رێگەیەكی دیكەمان نییە جگە لە توندكردنی رێكارەكان نەبێت بۆ ماوەی 2 هەفتە، تەنیا رێگە بەو گەشتە ئاسمانیانە دەدرێت، كە لە دەرەوە بۆ ناو لوبنان دەكرێن".

ئاماژەی بەوەشدا، "بەم نزیكانە سەنتەری بەڕێوەبردنی كارەساتەكانی سەر بە وەزارەتی تەندروستی لە نەخۆشخانەی رەفیق حەریری كارا دەكرێت و بۆ ماوەی 24 كاتژمێر لە ئامادەباشیدا دەبێت، چونكە نەخۆشخانەكانی دیكە توانای وەرگرتنی تووشبووی زیاتریان نییە".

تا ئێستا 2 هەزار و 822 كەس لە لوبنان تووشی ڤایرۆسی كۆرۆنا بوونە، لەو ژمارەیەش 51 كەس گیانیان لەدەستداوە.














K24