ژمارەی تووشبووانی کۆرۆنا لە هیندستان یەک ملیۆن کەسی تێپەڕاند و لە بەرازیلیش ژمارەی تووشبووان بۆ سەرووی دوو ملیۆن تووشبوو بەرزبووەوە.

بەپێی ئامارەکانی ماڵپەڕی وۆڵد ئۆمیتەر، ژمارەی تووشبووانی کۆرۆنا لە هیندستان گەیشتە یەک ملیۆن و 5 هەزار کەس، ئێستا لەسەر ئاستی جیهان، ئەو وڵاتە لە ریزی سێیەمدا دێت لەدوای بەرازیل کە ژمارەی تووشبووانی ئەو وڵاتەش لە هەڵکشانە و لە سەرووی دوو ملیۆن تووشبووی تۆمارکردووە.

لە هیندستان، ئامارە فەرمییەکان پیشانی دەدەن لە ماوەی 24 کاژێری رابردوودا زیاتر لە 35 هەزار تووشبوو و هەروەها 700 مردوو تۆمارکراون، ئەوە لە وڵاتێك کە ژمارەی دانیشتووانی یەک ملیار و 300 ملیۆن کەسە.

هەرچی بەرازیلە کە ژمارەی دانیشتووانی زیاتر لە 212 ملیۆن کەسە، ژمارەی تووشبووانی کۆرۆنا تێیدا گەیشتووەتە 2 ملیۆن و 14 هەزار تووشبوو، کە نزیکەی 79 هەزار لەو تووشبووانە گیانیان لەدەستداوە. لەو وڵاتەدا تەنانەت سەرۆکی وڵاتیش لە کۆرۆنا پارێزراو نییە و نزیکەی هەفتەیەکە تووشی کۆرۆنا بووە.

دوای بەرزبوونەوەی ئاماری تووشبووان، حکومەتی هیندستان بڕیاریدا بە تووندترکردنی رێکار و رێنماییە تەندروستییەکان. لە شوێنە قەرەباڵخەکاندا قەدەخەی هاتوچۆی راگەیاندووەتەوە.

بەرپرسانی تەندروستی هیندستان ئاشکرایانکرد، وێڕای بەرزبوونەوەی ژمارەی تووشبووانی کۆرۆنا و هەڵکشانی قوربانییانی ئەو نەخۆشییە، بەڵام هێشتا رێژەی قوربانیان بە بەراورد لەگەڵ ژمارەی دانیشتووانی ئەو وڵاتە، نزمە.

ئاشکراشیانکرد، ئامارەکان پیشانی دەدەن لەنێو هەموو یەک ملیۆن دانیشتووی هیندستان، 18 کەس بە کۆرۆنا گیانیلەدەستداوە، لەکاتێكدا لە ئەمریکا کە لە ریزی یەکەمی وڵاتانی جیهانە لەڕووی تووشبووانی کۆرۆنا، بۆ هەر یەک ملیۆن دانیشتوویەکی ئەو وڵاتە 417 کەس گیانیان لەدەستداوە.

لەلایەکی دیکەوە، یەکێتیی رێکخراوەکانی خاچی سووری نێودەوڵەتی هۆشداری دەدات لە هەڵکشانی ژمارەی تووشبووانی کۆرۆنا لە ناوچەی باشووری ئاسیا و رایگەیاند: زیادبوونی تووشبووانی کۆرۆنا ئاماژەیەکە بەوەی کە لە داهاتوویەکی نزیکدا، وڵاتانی باشووری ئاسیا دەبنە سەرچاوەی سەرەکی بڵاوبوونەوەی ڤایرۆسی کۆرۆنا لە جیهاندا.

جۆن فلیمینگ بەرپرسی یەکەمی یەکێتییەکە رایگەیاند: لەکاتێكدا جیهان بە بڵاوبوونەوەی ڤایرۆسی کۆرۆنا لە ئەمریکای ناوەڕاست و باشوور سەرقاڵە، چاوەڕێ دەکرێت بەهۆی ڤایرۆسی کۆرۆناوە، کارەساتێکی مرۆیی گەورە لە باشووری ئاسیا رووبدات.

ئەو 10 وڵاتەی زۆرترین تووشبووی کۆرۆنایان هەیە:

ئەمریکا

تووشبوو: 3,695,025

چاکبوونەوە: 1,679,633

مردن: 141,118



بەرازیل

تووشبوو: 2,014,738

چاکبوونەوە: 1,366,775

گیانلەدەستدان: 76,822



هیندستان

تووشبوو: 1,005,637

چاکبوونەوە: 636,602

گیانلەدەستدان: 25,609



رووسیا

تووشبوو: 752,797

چاکبوونەوە: 531,692

گیانلەدەستدان: 11,937



پیرۆ

تووشبوو: 341,586

چاکبوونەوە: 230,994

گیانلەدەستدان: 12,615



ئەفریقیای باشوور

تووشبوو: 324,221

چاکبوونەوە: 165,591

گیانلەدەستدان: 4,669



مەکسیک

تووشبوو: 324,041

چاکبوونەوە: 203,464

گیانلەدەستدان: 37,574



چیلی

تووشبوو: 323,698

چاکبوونەوە: 295,301

گیانلەدەستدان: 7,290



ئیسپانیا

تووشبوو: 305,935

گیانلەدەستدان: 28,416



بەریتانیا

تووشبوو: 292,552

گیانلەدەستدان: 45,119










رووداو